উত্তপ্ত উত্তৰ গুৱাহাটী, প্ৰশাসনৰ বিনা অনুমতিত স্থাপন জনস্বাস্থ্য বিৰোধী উদ্যোগ - উত্তৰ গুৱাহাটীত প্ৰদূষণযুক্ত শিল ভজা উদ্যোগকক লৈ উত্তপ্ত পৰিস্থিতি
উত্তৰ গুৱাহাটীৰ ৰজাদুৱাৰ, ৰংমহল, ৰূদ্ৰেশ্বৰকে ধৰি কেইবাখনো গাঁৱৰ প্ৰাকৃতিক পৰিবেশ বিনষ্ট কৰিছে কামৰূপ জিলা প্ৰশাসনৰ বিনা অনুমতিত স্থাপন কৰা 'হাইটেক' নামৰ জনস্বাস্থ্য বিৰোধী উদ্যোগটোৱে ৷ এনে প্ৰদূষণযুক্ত ধোৱা নিৰ্গত হোৱা উদ্যোগটোৰ ফলত অঞ্চলবাসীৰ শৰীৰত বিভিন্ন ধৰণৰ চৰ্ম ৰোগে দেখা দিয়াৰো অভিযোগ উপস্থিত ৰাইজৰ ৷
গুৱাহাটী, 13 ছেপ্টেম্বৰ: উত্তৰ গুৱাহাটীত প্ৰদূষণযুক্ত শিল ভজা উদ্যোগকক লৈ উত্তপ্ত পৰিস্থিতি ৷ শুকুৰবাৰে বিতৰ্কিত উদ্যোগটোত হঠাৎ আহি উপস্থিত হয় শতাধিক স্থানীয় পুৰুষ-মহিলা ৷ লগতে ৰাজহুৱা অভিযোগৰ ভিত্তিত চজমিন তদন্তৰ বাবে ঘটনাস্থলীত উপস্থিত উত্তৰ গুৱাহাটী ৰাজহ চক্ৰৰ চক্ৰ বিষয়া প্ৰণৱ গোস্বামী ৷ সম্ভাব্য বিপদৰ আশংকাত মোতায়েন কৰা হয় আৰক্ষীৰ লোক ৷ চক্ৰ বিষয়াৰ উপস্থিতিত ক্ষোভ উজাৰি স্থানীয় ৰাইজৰ অভিযোগ, উত্তৰ গুৱাহাটীৰ ৰজাদুৱাৰ, ৰংমহল, ৰূদ্ৰেশ্বৰকে ধৰি কেইবাখনো গাঁৱৰ প্ৰাকৃতিক পৰিবেশ বিনষ্ট কৰিছে কামৰূপ জিলা প্ৰশাসনৰ বিনা অনুমতিত স্থাপন কৰা 'হাইটেক' নামৰ জনস্বাস্থ্য বিৰোধী উদ্যোগটোৱে ৷ এনে প্ৰদূষণযুক্ত ধোৱা নিৰ্গত হোৱা উদ্যোগটোৰ ফলত অঞ্চলবাসীৰ শৰীৰত বিভিন্ন ধৰণৰ চৰ্ম ৰোগে দেখা দিয়াৰো অভিযোগ উপস্থিত ৰাইজৰ ৷ উদ্যোগটো বন্ধ কৰি দিয়াৰ দাবী জনাই অন্যথা তীব্ৰ প্ৰতিবাদ গঢ়ি তোলা হ'ৱ বুলি প্ৰকাশ কৰে স্থানীয় ৰাইজে ৷ তদন্তৰ বাবে শেহতীয়াকৈ বন্ধ কৰি ৰখা হৈছে বিতৰ্কিত উদ্যোগটো ৷