হঠাৎ নিবনুৱা হৈ পৰিল 900 গৰাকী শিক্ষক-কৰ্মচাৰী

আজিৰে পৰা নিবনুৱা হৈ পৰিল ৰাজ্যৰ 900 গৰাকী শিক্ষক তথা কৰ্মচাৰী (Many teachers and employees of the state become unemployed) ৷ বিগত 14 টা বছৰে সমাজৰ এক বিশেষ শ্ৰেণীৰ ছাত্ৰ-ছাত্ৰীৰ জীৱন গঢ়াত ব্ৰতী হৈ থকা এইসকল কৰ্মচাৰীৰ জীৱনলৈ নামিছে এতিয়া ঘোৰ অমানিশা ৷ উপায়ন্তৰ হৈ এইসকল কৰ্মচাৰীৰ চৰকাৰলৈ আহ্বান, সৰ্বশিক্ষাৰ অধীনত কৰা কৰ্মৰ অভিজ্ঞতা আৰু যোগ্যতাৰ ভিত্তিত সকলোকে যেন সংস্থাপিত কৰাৰ ব্যৱস্থা কৰে ।

ৰঙিয়া, 1 জুন :আজিৰ পৰা কৰ্ম সংস্থাপন হেৰুৱাব লগা হৈছে ৰাজ্যৰ শিক্ষা বিভাগৰ অধীনত শিক্ষা সেৱা আগবঢ়াই থকা প্ৰায় 900 শিক্ষক-কৰ্মচাৰীয়ে (Many teachers and employees of the state become unemployed) । এই শিক্ষক-কৰ্মচাৰীসকল হৈছে সৰ্বশিক্ষাৰ অধীনস্থ ৰাজ্যৰ বিভিন্ন প্ৰান্তত থকা 96 খন আৱাসিক বিশেষ প্ৰশিক্ষণ কেন্দ্ৰত নিয়োজিত হৈ থকা লোক । কান্দোনত ভাঙি পৰিছে এতিয়া এইসকল কৰ্মচাৰী ।

শিক্ষা বিভাগৰ এক নিৰ্দেশনা অনুসৰি ৰঙিয়াস্থিত আৱাসিক বিশেষ প্ৰশিক্ষণ কেন্দ্ৰৰ শিক্ষানুষ্ঠানখন বুধবাৰৰ পৰা বন্ধ হৈ পৰে ৷ উল্লেখ্য যে, বিগত 14 বছৰে শিক্ষা সেৱা আগবঢ়াই আহিছিল এই শিক্ষানুষ্ঠানখনে ৷ বৰ্তমান শিক্ষানুষ্ঠানখনৰ পৰা এপদ এপদকৈ সামগ্ৰীসমূহ নি থকাত শোকত ভাগি পৰিছে এতিয়া কৰ্মচাৰীসকল ।

বিগত 14 টা বছৰে সমাজৰ এক বিশেষ শ্ৰেণীৰ ছাত্ৰ-ছাত্ৰীৰ জীৱন গঢ়াত ব্ৰতী হৈ থকা এইসকল কৰ্মচাৰীৰ সন্মুখত এতিয়া অন্ধকাৰ ভৱিষ্যত । শিক্ষা বিভাগৰ এক নিৰ্দেশনা অনুসৰি কেন্দ্ৰটোৰ শিক্ষক-কৰ্মচাৰীয়ে বুধবাৰে কেন্দ্ৰটোৰ সকলো সাঁ-সজুলি বিভাগটোক ওভতাই দিব লগীয়া হৈছে ।

কিন্তু জীৱনৰ বহুমূলীয়া সময় শিক্ষা সেৱা আগবঢ়োৱাৰ পিছত কেন্দ্ৰটো এৰি যাবলৈ ওলোৱাত কান্দোনত ভাঙি পৰিছে সকলো কৰ্মচাৰী । কেন্দ্ৰটো এৰিবলৈ ওলোৱা এইসকল কৰ্মচাৰীয়ে এতিয়া নিজৰ পৰিয়াল পোহপাল দিয়াক লৈয়ো চিন্তিত হৈ পৰিছে । দীৰ্ঘদিন শিক্ষাদান কৰাৰ পিছত চৰকাৰে এই বিদ্যালয়সমূহ বন্ধ কৰি দিয়াত এইসকল শিক্ষক-কৰ্মচাৰী এতিয়া বিপাঙত পৰিছে ।

কি কৰিব, ক’লৈ যাব ? অশ্ৰুসিক্ত নয়নেৰে চৰকাৰলৈ আহ্বান এইসকল লোকৰ, সৰ্বশিক্ষাৰ অধীনত কৰা কৰ্মৰ অভিজ্ঞতা আৰু যোগ্যতাৰ ভিত্তিত সকলোকে যেন সংস্থাপিত কৰাৰ ব্যৱস্থা কৰে ।

লগতে পঢ়ক :এছ আই কেলেংকাৰীৰ অন্যতম অভিযুক্ত দ্বিবন ডেকাৰ জামিন নাকচ