পোহৰ আৰু শব্দ যন্ত্ৰীৰ ওপৰত কৰ'ণাৰ প্ৰভাৱ

কৰ'ণাৰ বাবে প্ৰায় দুটা বছৰ বিভিন্ন সাংস্কৃতিক, ধৰ্মীয় আদি ৰাজহুৱা অনুষ্ঠানবোৰ হোৱা নাই । যাৰ বাবে পোহৰ আৰু শব্দ যন্ত্ৰবোৰৰো প্ৰয়োজন হোৱা নাই । ফলত উপাৰ্জনৰ পথ বন্ধ হৈ আছে এই ক্ষেত্ৰখনৰ সৈতে জড়িত লোকসকলৰ ।

কামৰূপ,২০ আগষ্ট :ক'ৰ'ণা (Corona) মহামাৰীৰ বিভীষিকাৰ ফলত ৰাজ্যৰ সাংস্কৃতিক তথা অন্যান্য অনুষ্ঠানবোৰ বন্ধ থকাৰ ফলত যোৱা দুটা বছৰে শব্দ যন্ত্ৰী মালিক আৰু কৰ্মচাৰীসকলৰ অৱস্থা খুবেই শোচনীয় হৈ পৰিছে । বৰ্তমান তেওঁলোকে পেটৰ তাড়নাত পৰিয়াল পোহ পাল দিয়াৰ বাবে অন্য পথ বাচি ল'বলগীয়া হৈছে । কোনোৱে শাক-পাচলিৰ দোকান দিছে, কোনোবাই আকৌ ব্ৰইলাৰ মাংস বিক্ৰী কৰিছে আন কোনোৱে আকৌ পদ পথত দোকান দিয়া পৰিলক্ষিত হৈছে ।

যোৱা দুটা বছৰে তেওঁলোকৰ শব্দ যন্ত্ৰবোৰ ঘৰতে পৰি থকাৰ ফলত কিছু সামগ্ৰী নিগনিয়ে কুটি তহিলং কৰিছে । অকাৰ্যক্ষম হৈ পৰি আছে লাখ লাখ টকাৰ সা-সামগ্ৰী । এই সন্দৰ্ভত উত্তৰ কামৰূপ জিলাৰ চাউণ্ড এণ্ড লাইট এচ'ছিয়েচনে (Sound And Light Association) প্ৰতিক্ৰিয়া ব্যক্ত কৰিছে ।

এচ'ছিয়েচনৰ মতে তেওঁলোকে এই ক্ষেত্ৰত সাহাৰ্য বিচাৰি জিলাখনৰ চাৰিওটা সমষ্টিৰ বিধায়ক, সাংসদ দিলীপ শ‌ইকীয়া (MP Dilip Saikia),সাংস্কৃতিক মন্ত্ৰী বিমল বৰাৰ (Bimal Borah) লগতে ৰাজ্যৰ মুখ্যমন্ত্ৰীক পৃথকে পৃথকে স্মাৰক পত্ৰ দিছে । কিন্তু আজিলৈ কোনো সুফল পোৱা নাই তেওঁলোকে । সেয়ে পুনৰবাৰ এচ'ছিয়েচনে চৰকাৰক অনুৰোধ জনাইছে যাতে এই ক্ষেত্ৰত গুৰুত্ব দিয়ে চৰকাৰে । নহ'লে ইয়াতকৈও ভয়াৱহ পৰিস্থিতিৰ দিশে যাব এই ক্ষেত্ৰত মালিক তথা কৰ্মচাৰীসকল ।

লগতে পঢ়ক :প্ৰতিবাদস্থলীৰ পৰাই অসম জাতীয় পৰিষদৰ নেতাক আটক