আমিনগাঁও, 7 ফেব্ৰুৱাৰীঃ ৰাজ্যত ধাৰাবাহিক ধৰ্ষণৰ ঘটনা সংঘটিত হোৱাৰ মাজতে এইবাৰ পোহৰলৈ আহিল আন এক যৌন নিৰ্যাতনৰ ঘটনা ৷ কামৰূপৰ আমিনগাঁৱত সংঘটিত হ’ল এক জঘন্য যৌন নিৰ্যাতনৰ ঘটনা ৷ দুৰ্বত্ত যুৱকৰ কামনাৰ বলি হ’ল এগৰাকী স্কুলীয়া ছাত্ৰী ৷ কিশোৰীগৰাকীক ধাৰাবাহিকভাৱে যৌন আতিশায্য চলোৱাৰ অভিযোগ যুৱকজনৰ বিৰুদ্ধে ৷ আমিনগাঁৱৰ লাচিতপুৰৰ হিমাংশু দাস নামৰ এজন যুৱকে প্ৰেমৰ প্ৰলোভনেৰে কিশোৰীগৰাকীক যৌন আতিশায্য চলাইছে বুলি অভিযোগ উত্থাপন কৰে কিশোৰীগৰাকী আৰু পৰিয়ালৰ লোকে ৷
আমিনগাঁৱত যৌন নিৰ্যাতনৰ বলি কিশোৰী উল্লেখ্য যে চিৰাঙৰ বিজনী নিবাসী কিশোৰীগৰাকীৰ পৰিয়োলটো ভাড়াতীয়া হিচাপে বাস কৰিছিল আমিনগাঁৱৰ পামবস্তীত ৷ এই সূত্ৰেই যুৱকজনে কিশোৰীগৰাকীৰ সৈতে চিনাকী হৈ প্ৰেমৰ চলনাৰে নিজৰ অসৎ কাৰ্য সংঘটিত কৰিছিল বুলি বুলি অভিযোগ উত্থাপিত হৈছে ৷ এতিয়া ন্যায় বিচাৰি কিশোৰগৰাকীৰ পৰিয়াল আৰু মহিলা সমিতিয়ে আমিনগাঁও আৰক্ষী চকীত যুৱকজনৰ বিৰুদ্ধে এজাহাৰ দাখিল কৰিছে ৷ যুৱকজনৰ বিৰুদ্ধে ভাৰতীয় দণ্ডবিধিৰ অধীনত 366/376 ধাৰাত গোচৰ ৰুজু কৰা হৈছে ৷ কিন্তু গোচৰ ৰুজু হোৱাৰ পিচতো এতিয়ালৈ যুৱকজনক কাৰায়ত্ত কৰিবলৈ সক্ষম হোৱা নাই আমিনগাঁও আৰক্ষী ৷ ইয়াকে লৈ তীব্ৰ ক্ষোভ প্ৰকাশ কৰিছে পৰিয়ালৰ লোক তথা স্থানীয় ৰাইজে ৷ 