গুৱাহাটী,21 আগষ্ট: কেন্দ্ৰীয় মন্ত্ৰী হিচাপে দায়িত্বভাৰ গ্ৰহণৰ পাছত প্ৰথমবাৰৰ বাবে অসমলৈ অহা প্ৰাক্তন মুখ্যমন্ত্ৰী সৰ্বানন্দ সোণোৱালক শনিবাৰে বিজেপিৰ ৰাজ্যিক মুখ্য কাৰ্যালয়ত উষ্ম আদৰণি জনোৱা হয় ৷ জন আশীৰ্বাদ যাত্ৰাৰ বাবে তিনিদিনীয়া কাৰ্যসূচীৰে অসমলৈ আহিছে কেন্দ্ৰীয় মন্ত্ৰীগৰাকী ৷ শনিবাৰে অসমত উপস্থিত হোৱাৰ পিছতে বাজপেয়ী ভৱনত মুখ্যমন্ত্ৰী হিমন্ত বিশ্ব শৰ্মা, দলৰ ৰাজ্যিক সভাপতি ভৱেশ কলিতাকে ধৰি দলীয় নেতা-কৰ্মীসকলে সৰ্বানন্দ সোণোৱালক সম্ভাষণ জনায় ৷
অনুষ্ঠানত ৰাজ্যিক বিজেপিৰ নৱনিৰ্বাচিত বিষয়ববীয়াৰে সোণোৱালৰ সৈতে পৰিচয় কৰাই দিয়া হয় ৷ ভাষণ প্ৰসংগত কেন্দ্ৰীয় মন্ত্ৰী সোণোৱালে কয়,"ৰাজ্যৰ 3.40 কোটি জনতাৰ আশীৰ্বাদ বিচাৰি এই জন আশীৰ্বাদ যাত্ৰা আৰম্ভ কৰিছো ৷ 130 কোটি জনতাৰ আশীৰ্বাদ বিচাৰি দেশজুৰি এই কাৰ্যসূচী আৰম্ভ কৰা হৈছে ৷ প্ৰধানমন্ত্ৰী নৰেন্দ্ৰ মোডীয়ে গ্ৰহণ কৰা পদক্ষেপক আজি বিশ্বই প্ৰশংসা কৰিছে ৷"
অনুষ্ঠানত মুখ্যমন্ত্ৰী হিমন্ত বিশ্ব শৰ্মাই কয়, কেন্দ্ৰত উত্তৰ-পূৰ্বাঞ্চলৰ পাঁচজনকৈ মন্ত্ৰী থকাটো উল্লেখযোগ্য কথা ৷ ইয়াৰে দুজন কেবিনেট মন্ত্রী। ৰাইজৰ আশীৰ্বাদ হৈছে কাম কৰাৰ প্ৰেৰণা আৰু সেই প্ৰেৰণা ল'বলৈ আহিছে সৰ্বানন্দ সোণোৱাল ৷ তেওঁক মোডী মন্ত্ৰীসভাত গুৰুত্বপূৰ্ণ দপ্তৰ দিয়া হৈছে ৷ অসমৰ ৰাইজে তেওঁৰ পৰা যথেষ্ট আশা কৰে ৷