ছয়গাঁও, 11 ছেপ্তেম্বৰ : দক্ষিণ কামৰূপত একাংশ বন বিষয়াৰ সৈতে বালি মাফিয়াই মিলি বালিৰ চিণ্ডিকেট চলাই অহাৰ পিচত এইবাৰ অংক নিমিলাৰ বাবে বামুনীগাঁৱৰ ৰেঞ্জাৰ কুশল দাস বাহিনীয়ে ৰডেৰে কোবাই মূৰ ফালিলে ৰাজদ্বীপ দাস নামৰ এজন বালি মাফিয়াৰ ।
উল্লেখযোগ্য যে,বালি মাফিয়া আৰু একাংশ বন বিষয়াই মিলি দীৰ্ঘদিন ধৰি চলাই আহিছে বালিৰ চিণ্ডিকেট । কিন্তু কেতিয়াবা কেতিয়াবা অংক নিমিলিলেই দুয়ো পক্ষৰ মাজত সৃষ্টি হয় সংঘাত । অভিযোগ অনুসৰি,কুশল দাস বাহিনীয়ে বালি মাফিয়াৰ পৰা মাহিলী ধন নোপোৱাৰ বাবেই বালি মাফিয়াৰ মূৰ ফালি সৃষ্টি কৰিলে সন্ত্রাসৰ ।
জানিব পৰা মতে,বৃহস্পতিবাৰে নিশা বালি মাফিয়া ৰাজদ্বীপ দাস ওৰফে বাবুৰ বালি ট্ৰাকৰ মাহিলী ধন আদায় নোপোৱাৰ বাবেই ৰাজপথৰ পৰা জব্দ কৰি বামুনীগাঁওস্থিত কাৰ্যালয়লৈ লৈ আহিছিল কুশল দাসে । পিছে পিছে ট্ৰাকৰ মালিক ৰাজদ্বীপ গৈ কাৰ্যালয় চৌহদত প্ৰৱেশ কৰাৰ পিচতে গেটৰ দুৱাৰ বন্ধ কৰি লৈ ৰেঞ্জাৰ কুশল দাস বাহিনীয়ে ৰড,কাঠৰ টুকুৰা,লাঠি আদিৰে উপৰ্যুপৰি আক্ৰমণ কৰাৰ অভিযোগ উত্থাপন হৈছে ।