ৰঙিয়া,12 নৱেম্বৰ: ৰঙিয়াত বৰকুকুৰীয়া গাঁৱত হিন্দু-মুছলমানৰ মাজত সম্প্ৰীতিৰ অপূৰ্ব নিদৰ্শন ৷ ৰঙিয়াত বৰকুকুৰীয়া গাঁৱত ৰাস মহোৎসৱ অংশগ্ৰহণ মুছলমান লোকৰ ৷ ৰাসত অংশগ্ৰহণৰ লগতে ৰাস উৎসৱ অনুষ্ঠিত কৰাত পূৰ্ণ সহযোগিতা মুছলমান সমাজৰ ৷ ৰাস উপলক্ষে বৰকুকুৰীয়া গাঁৱত এখন দলং নিৰ্মাণ কৰে মুছলমান লোকসকলে ৷
বৰকুকুৰিয়াত প্ৰতিবছৰে বৃহত্তৰ অঞ্চলটোৰ ৰাইজে উদযাপন কৰি আহিছে শাৰদীয় ৰাস মহোৎসৱ । কিন্তু কাষেৰে বৈ যোৱা বৰলীয়া নৈৰ ওপৰত দলং নথকাত অঞ্চলটোৰ একাংশ ৰাইজে ৰাসত মহোৎসৱ অংশগ্ৰহণ কৰিব নোৱাৰে ৷ ইয়াৰোপৰি এই অঞ্চলটোৰ ৰাইজে বছৰ বছৰ ধৰি ভুগি আহিব লগা হৈছে যাতায়ত সমস্যা। দলঙৰ অভাৱত দুয়োপাৰৰ ৰাইজে ঘূৰি যাব লাগে কেইবা কিলোমিটাৰ বিপদসংকুল পথ। বছৰ বছৰ ধৰি চৰকাৰক কাকূতি মিনতি কৰিও নাপালে এখন স্থায়ী দলং। উপায়ন্তৰ হৈ প্ৰতি বছৰৰ দৰে এইবাৰো ৰাসৰ সময়ত বৰকুকুৰিয়াত বৰলীয়া নৈত অহা-যোৱা কৰিবলৈ দলং সজাত ব্যস্ত হৈ পৰিছে অঞ্চলটোৰ লোক। মুছলমান সম্প্ৰদায়ৰ লোকসকলেও আন্তৰিকতাৰে স্বতস্ফুৰ্তভাৱে পূৰ্বৰ দৰে বৰলীয়া নৈত বাঁহৰ দলং সাজি যাতায়তৰ সমস্যা সাময়িক ভাৱে সমাধান কৰাত সহায়ৰ হাত আগবঢ়াইছে ৷ উল্লেখ্য যে যি সময়ত ধৰ্মৰ দোহাই দি একাংশ লোকে সমাজত অশান্তিৰ সৃষ্টি কৰি আছে তেনে সময়তে বৰকুকুৰীয়া ৰাইজৰ এই পদক্ষেপে সমাজলৈ এক আদৰ্শ দাঙি ধৰিছে ৷
লগতে চাওকঃহাউলীত শুভাৰম্ভ ৯২ সংখ্যক ৰাস মহোৎসৱ