বন্দুক দেখুৱাই ৰঙিয়াত ডকাইতি কাণ্ড

মটৰ চাইকেলেৰে অহা ছয় জনীয়া ডকাইতৰ দলে চুৰিৰে আঘাত কৰাৰ লগতে বন্দুক দেখুৱাই কাঢ়ি নিলে ব্যৱসায়ীৰ বেগ ৷

ৰঙিয়া,16 চেপ্তেম্বৰঃ ৰঙিয়াত পিয়াপি দি ফুৰিছে দুৰ্ধৰ্ষ ডকাইতৰ দলে ৷ নিশা হ'লেই ডকাইতৰ দলৰ টাৰ্গেট হৈ পৰিছে একাংশ ব্যৱসায়ী ৷ দেওবাৰে ৰঙিয়াৰ শলমাৰী নিবাসী ময়দুল ইছলাম নামৰ ব্যৱসায়ীজনে ৰঙিয়াত থকা নিজ ব্যৱসায়িক প্ৰতিষ্ঠান বন্ধ কৰি ঘৰলৈ আহি থকাৰ পথতেই আক্ৰমণৰ সন্মুখীন হয় ছয় জনীয়া এটা ডকাইতৰ দলৰ ৷ মটৰ চাইকেলেৰে অহা ডকাইতৰ দলটোৱে প্ৰথমে ব্যৱসায়ী জনক খুন্দা মাৰি পথৰ কাষত পেলাই দিয়ে আৰু তাৰ পাছতেই বন্দুক দেখুৱাই ব্যৱসায়ীজনৰ হাতত থকা টকাৰ বেগ কাঢ়ি লৈ তৎক্ষণাত উধাও হয় ঘটনাস্থলীৰ পৰা ৷ ইয়াৰোপৰি ডকাইতৰ দলটোৱে চুৰিৰে আঘাত কৰাৰ ফলত আহত হয় ব্যৱসায়ী জন ৷ পৰৱৰ্তী সময়ত আৰক্ষীয়ে ঘটনাস্থলীত উপস্থিত হৈ ডকাইতৰ দলটোৰ সন্ধানত অভিযান আৰম্ভ কৰিছে যদিও সদাব্যস্ত ৰঙিয়া মহকুমাধিপতি পথত ঘটা এনে ঘটনাই আতংকিত কৰি তুলিছে ৰঙিয়াৰ ৰাইজক।