আমিনগাঁও,12 জুন:দেশৰ আগশাৰীৰ প্ৰযুক্তিবিদ্যাৰ উচ্চ শিক্ষা প্ৰতিষ্ঠান আইআইটি উত্তৰ গুৱাহাটীস্থিত চৌহদত বিৰাজ কৰিছে কৰ'ণাৰ আতংক ৷ শৈক্ষিক প্ৰতিষ্ঠানখনৰ সঞ্চালক টিজি চিঠাৰামনৰ অ-বিবেচকী কাণ্ডই আতংক সৃষ্টি কৰিছে সম্প্ৰতি চৌহদত ৷ চৰকাৰী নীতি-নিৰ্দেশনা উলংঘা কৰি সঞ্চালকগৰাকী চলিত সপ্তাহৰ মঙলবাৰে বেংগালুৰুৰ পৰা অসমলৈ আহে ৷ বহিঃৰাজ্যৰ পৰা অহা স্বত্বেও সঞ্চালকগৰাকী নাছিল কোৱাৰেণ্টাইনত ৷ তাৰ পৰিৱৰ্তে আইআইটি গুৱাহাটীৰ কেইবাখনো সভাত অংশগ্ৰহণ কৰে সঞ্চালকগৰাকীয়ে ৷
তদুপৰি ভাৰতীয় মানৱ সম্পদ মন্ত্ৰী ৰমেশ পোখৰিয়ালৰ সৈতে এক ভিডিঅ’ কনফাৰেঞ্চৰ জৰিয়তে শিক্ষানুষ্ঠানখনৰ ৰেংকিং প্ৰচাৰ সংক্ৰান্তীয় বিষয়ৰ সভাতো অন্যান্য অধ্যাপকসকলৰ সৈতে অংশ লৈছিল সঞ্চালক চিঠাৰামনে ৷ ফলত এতিয়া শিক্ষা প্ৰতিষ্ঠানখনত বিৰাজ কৰিছে আতংকই ৷ প্ৰায় তিনিমাহৰ অন্তত বেংগালুৰুৰ পৰা ৰাজ্যলৈ অহাৰ ২৪ ঘণ্টা সম্পূৰ্ণ নোহোৱাৰ পিছতো সতীৰ্থ অধ্যাপকৰ সৈতে অংশ লৈছিল বৈঠকত ৷ বৰ্তমান প্ৰতিষ্ঠানখনৰ প্ৰায় তিনি হাজাৰ আৱাসীৰ জীৱনক লৈ হেতালি খেলা সঞ্চালক গৰাকীৰ কাণ্ডজ্ঞানহীন কাৰ্যক গৰিহণা দিছে সচেতন মহলে ৷ লগতে বিষয় প্ৰসংগত বিহিত ব্যৱস্থা গ্ৰহণ কৰিবলৈ জিলা উপায়ুক্তক দাবী জনাইছে সচেতন মহলে ৷ ৰাইজৰ এই দাবীৰ প্ৰতি সঁহাৰি জনাই প্ৰতিক্ৰিয়া প্ৰকাশ কৰে কামৰূপ জিলা উপায়ুক্ত কৈলাশ কাৰ্তিক এনে ৷ উপায়ুক্ত গৰাকীয়ে ঘটনাৰ তদন্তৰ নিৰ্দেশ দিছে আৰক্ষীক ৷
লগতে চাওকঃ১৭ বছৰেই পাগলাদিয়া নদীৰ ওপৰত নিৰ্মাণ নহ'ল দলংঃ ৰাইজৰ দুৰ্ভোগ
