ৰঙিয়াৰ বিদ্যালয়ত মহকুমাধিপতিৰ ছাডেন ভিজিট

ৰঙিয়াৰ ২৪ নং মুৰাৰা প্ৰাথমিক বিদ্যালয়ত মহকুমাধিপতিৰ তাৎক্ষণিক পৰিদৰ্শন ৷ বিদ্যালয়খনত মধ্যাহ্ন ভোজনত খেলিমেলিৰ অভিযোগ

ৰঙিয়া, 7 চেপ্তেম্বৰ: ৰঙিয়াৰ ২৪ নং মুৰাৰা প্ৰাথমিক বিদ্যালয়ত শনিবাৰে তাৎক্ষণিকভাৱে পৰিদৰ্শন কৰে ৰঙিয়াৰ মহকুমাধিপতি মুনীন্দ্ৰ বৰদলৈয়ে । বহুদিনৰ পৰা ৰাইজে দিয়া অভিযোগৰ বিষয়ে অনুসন্ধান কৰিবলৈ মহকুমাধিপতি গৰাকী বিদ্যালয়খনত উপস্থিত হয় । অভিযোগ অনুসৰি যোৱা এমাহ ধৰি বিদ্যালয়খনৰ মধ্যাহ্ন ভোজন বিতৰণত খেলিমেলি হৈ আছিল । এই অভিযোগৰ অনুসন্ধানত মহকুমাধিপতিয়ে বিদ্যালয়খন তলা লগোৱা অৱস্থাত প্ৰত্যক্ষ কৰে । নিয়ম অনুসৰি শনিবাৰে 12.30 বজালৈ বিদ্যালয় খোলা ৰাখিব লাগে যদিও 11 বজাতেই বিদ্যালয় বন্ধ কৰা হৈছিল। তাৰ পিছত তলা খুলি ভিতৰলৈ গৈ তেখেতে মধ্যাহ্ন ভোজনৰ চাউল ব্যৱহাৰ নোহোৱাকৈ পৰি থকা প্ৰত্যক্ষ কৰে । এই অনিয়ম সমুহৰ বিৰুদ্ধে যথাযথ ব্যৱস্থা লোৱা হ'ব বুলি তেওঁ উল্লেখ কৰে ।