কৃত্ৰিম বানপানীত ডুব গ'ল ৰঙিয়া থানাৰ চৌহদ

দেওবাৰে সন্ধিয়াৰ পৰা হোৱা মুষলধাৰ বৰষুণত পানীৰে ভৰি পৰিল থানাৰ চৌহদ । চৰকাৰী কোৰ্ৱাটাৰত ওলাইছে মাছ ।

ৰঙিয়া, ১৫ জুলাই : এজাক বৰষুণতেই পানীৰে ভৰি পৰে ৰঙিয়া থানাৰ চৌহদ । কালি বৰষুণত থানাখনত থকা চৰকাৰী আৱাসগৃহ সমূহ পানীৰে ভৰি পৰে । আগৰ পৰাই বসবাসৰ অনুপযোগী জৰাজীৰ্ণ হৈ পৰা এই আৱাসগৃহ সমূহ পানীৰে ভৰি পৰাত দুৰ্ভোগ ভুগিছে আৰক্ষী তথা তেওলোকৰ পৰিয়ালে । পানীৰ লগত সাপ,ভেকুলী আদি সোমাই পৰাত এতিয়া কণ কণ লৰা-ছোৱালীবোৰ আতংকিত হৈ পৰিছে । পানীৰ বাবে ঘৰৰ কোঠা কেইটাটো যাব নোৱাৰা হৈছে বাসিন্দা সকল । বিছনাত বহিয়েই পঢ়া-শুনা কৰিছে শিক্ষাৰ্থীসকলে । পানীৰ বাবে বাথৰুম পৰ্যন্ত যাব লোৱাৰা হৈছে অসহায় পৰিয়াল কেইটা । এনেদৰে এতিয়া এজাক বৰষুণ দিলেই আবাসগৃহ সমূহ পানীৰে ভৰি পৰা কথাটো প্ৰতিনিয়ত ঘটনাত পৰিণত হৈছে । ৰঙিয়া আৰক্ষীৰ সমস্যা সমূহ সমাধান কৰি আবাসগৃহ বোৰ বাসপযোগী কৰি দিবলৈ আৰক্ষীৰ উৰ্ধতম কৰ্তৃপক্ষক প্ৰাৰ্থনা জনাইছে আৰক্ষী পৰিয়াল তথা কণমানি সকলে ।