ৰঙিয়া,2 জানুৱাৰী : ৰঙিয়াৰ কেকেনিকুছী গাঁৱত দৰিদ্ৰ হিতাধিকাৰীৰ অন্ন সুৰক্ষাৰ বাবে প্ৰণয়ন কৰা ৰাষ্ট্ৰীয় খাদ্য সুৰক্ষা আইনখন উলংঘা কৰা হৈছে ৷ মৰাঞ্জনা গাঁও পঞ্চায়তৰ অন্তৰ্গত এই গাঁওখনৰ প্ৰায় 20 ঘৰ মানুহে বিগত প্ৰায় 5 বছৰৰ পৰা লাভ কৰা নাই চৰকাৰী চাউল ।
ৰাষ্ট্ৰীয় খাদ্য সুৰক্ষা আইনৰ পৰা বঞ্চিত ৰঙিয়াবাসী
গাঁওখনৰ পৰিয়ালসমূহে এবাৰ পঞ্চায়তত, এবাৰ যোগান বিভাগৰ কাৰ্যালয়ত ঘূৰি এতিয়া ভাগৰি পৰিছে । প্ৰতিবাৰেই দুয়োটা বিভাগেই নিজৰ দোষ আনৰ গালৈ ঠেলি দি হেমাহি কৰাৰ অভিযোগ উত্থাপন কৰিছে স্থানীয় ৰাইজে । তেওঁলোকে এতিয়ালৈকে চাৰিবাৰকৈ সকলো নথি-পত্ৰ জমা দিছে কাৰ্যালয়ত। কিন্তু বিভিন্ন অজুহাতৰ বাবে তেওঁলোকক যোৱা প্ৰায় 5 বছৰে বঞ্চিত কৰি ৰখা হৈছে আইনখনৰ সুৰক্ষাৰ পৰা ।