ৰঙিয়া, 31 অক্টোবৰ : ৰঙিয়াৰ হালিকুছি প্ৰাথমিক শাখাৰ বৰনামঘৰৰ গুৰু আসন প্ৰতিষ্ঠা দিৱস উপলক্ষে অনুষ্ঠিত কৰা দুদিনীয়া অনুষ্ঠানৰ মঙলবাৰে অন্ত পৰে । প্ৰথম দিনাৰ কাৰ্যসূচী অনুসৰি দিহা নামৰ প্ৰতিযোগিতা আৰু ভাগৱত পাঠৰ অন্তত দ্বিতীয় দিনাৰ কাৰ্যসূচীৰ আৰম্ভণি হয় ভাগৱত শোভাযাত্ৰাৰে । অঞ্চলটোৰ প্ৰায় চাৰি শতাধিক ভক্তপ্ৰাণ ৰাইজে ভাগৱত ভ্ৰমণৰ সময়ত হৰিধ্বনিৰে পৰিবেশ মুখৰিত কৰি তোলে ।
শোভাযাত্ৰাৰ সময়ত প্ৰতিখন ঘৰৰ লোকে ৰাইজৰ পদধূলা আৰু আশীৰ্বাদ গ্ৰহণ কৰে । ইয়াৰ পাচত নামঘৰৰ বাকৰিত এখন ধৰ্মালোচনা সভাৰ আয়োজন কৰা হয় । ধৰ্মালোচনী সভাখনৰ জৰিয়তে গুৰুজনাৰ সৃষ্টিৰাজি যাতে সকলোৰে মাজলৈ লৈ যাব পৰা যায়, তাৰ প্ৰয়াস কৰা হয় ৷ শ্ৰীমন্ত শংকৰদেৱ সংঘৰ পদাধিকাৰ ভবেন্দ্ৰ নাথ ডেকাই আঁতধৰা অনুষ্ঠানটোত অঞ্চলটোৰ ৰাইজৰ লগতে অভিনেতা বৈকুণ্ঠ প্ৰিন্স পাঠক আৰু কমল ডেকায়ো অংশগ্ৰহণ কৰে । আলোচনা সভাত গুৰুজনাৰ আদৰ্শৰ বিষয়ে আলোচনা কৰা হয় ।