গুৱাহাটী, 17 জুলাই : সমগ্ৰ দেশৰ লগতে অসমতো অব্যাহত থকা ক'ভিড আতংকৰ বাবে ৰাজ্যৰ লাখ লাখ শিক্ষাৰ্থীৰ শৈক্ষিক জীৱন বিপদাপন্ন হোৱাৰ সময়তে পোহৰলৈ আহিছে শিক্ষাখণ্ডত সংঘটিত হোৱা এক চাঞ্চল্যকৰ ঘটনা ৷ মেট্ৰিকত ভাল ৰিজাল্ট দিয়াৰ নামত বৃহৎ ধনৰ লেনদেন সংঘটিত কৰাৰ অভিযোগত শনিবাৰে কামৰূপ জিলাৰ স্কুল সমূহৰ পৰিদৰ্শকৰ কাৰ্যালয়ত 4 ঘন্টা ধৰি অভিযান চলালে কামৰূপ আৰক্ষীৰ বৃহৎ দলে ৷ অভিযান কালত কামৰূপ জিলাৰ স্কুল সমূহৰ পৰিদৰ্শক মাধৱ ডেকাৰ লগতে আন তিনি গৰাকী কৰ্মচাৰীক আটক কৰিছে আৰক্ষীয়ে ৷ আটকাধীন কেই গৰাকী হ'ল শিক্ষা বিভাগৰ জিলা আঁচনি বিষয়া তথা ছেবাৰ সমন্বয়ক ফুলপাহী নাথ, কাৰ্যালয়টোৰ কৰ্মচাৰী প্ৰশান্ত দাস আৰু এগৰাকী চতুৰ্থবৰ্গৰ কৰ্মচাৰী শিৱেশ্বৰ কলিতা ৷
উল্লেখ্য যে,মেট্ৰিকত ভাল ৰিজাল্ট দিয়াৰ বিনিময়ত কাৰ্যালয়টোত ব্যাপক ধনৰ লেনদেন হোৱাৰ খবৰ লাভ কৰাৰ পাছতে কাৰ্যালয়টোত এই অভিযান চলাই কামৰূপ আৰক্ষীৰ এশ জনীয়া এটা দলে ৷ আৰক্ষীয়ে জনাৱো মতে, কাৰ্যালয়টোৰ একাংশ কৰ্মচাৰীয়ে মেট্ৰিকৰ ফলাফলত প্ৰথম বিভাগ,ষ্টাৰ, ডিষ্টিংচন, স্থান নিৰ্ধাৰন আদিৰ বিনিময়ত ধনৰ লেনদেন কৰাৰ খবৰ লাভ কৰা হৈছে ৷ যাৰ বাবে শনিবাৰে কাৰ্যালয়টোত হঠাৎ অভিযান চলাই আৰক্ষীয়ে৷ বৰ্তমান আটক কৰা আটাই কেইগৰাকীকে পৃথকে পৃথকে মাৰাথান জেৰা অব্যাহত ৰাখিছে কামৰূপ আৰক্ষীয়ে ৷