বকো,২০ জুন: আজি কলাগুৰু বিষ্ণুপ্ৰসাদ ৰাভাৰ মৃত্যু তিথি । প্ৰতিবছৰৰ দৰে এইবাৰো ৰাজ্যপ্ৰান্তে প্ৰান্তে পালন কৰা হৈছে ৰাভা দিৱস । স্মৰণ কৰিছে বিপ্লৱী শিল্পীগৰাকীক । ৰাজ্যৰ ভিন্ন প্ৰান্তৰ সমান্তৰালভাৱে কামৰূপ জিলা ৰাভা ছাত্ৰ সন্থা, কামৰূপ জিলা মহিলা পৰিষদ আৰু কামৰূপ জিলা ষষ্ঠ অনুসূচী দাবী সমিতিৰ উদ্যোগত বেকেলী আঞ্চলিক ৰাভা ছাত্ৰ সন্থা, মহিলা পৰিষদ আৰু ষষ্ঠ অনুসূচী দাবী সমিতিৰ সহযোগত চেখাদাৰী গাঁৱত অৱস্থিত বেকেলী মৌজা ৰাভা জাতীয় পৰিষদৰ কাৰ্যালয়ৰ প্ৰাংগনত দিনযোৰা কাৰ্যসূচীৰে পালন কৰা হয় ২৯ তম বাৰ্ষিক বিষ্ণুপ্ৰসাদ ৰাভা দিৱস ।
মঙলবাৰে পুৱাৰভাগত আৰম্ভ হোৱা এই অনুষ্ঠানত পতাকা উত্তোলন, শ্বহীদ তৰ্পণ, কলাগুৰু বিষ্ণুপ্ৰসাদ ৰাভাৰ প্ৰতিচ্ছবিত মাল্যাৰ্পন, গছপুলি ৰোপণ কৰাৰ লগতে ছাত্ৰ-ছাত্ৰী সকলৰ মাজত অনুষ্ঠিত কৰা হয় চিত্ৰাংকন প্ৰতিযোগিতাৰ । অনুষ্ঠানসমূহৰ আঁত ধৰে কামৰূপ জিলা ৰাভা ছাত্ৰ সন্থাৰ সভাপতি আনন্দ ৰাভা, কামৰূপ জিলা মহিলা পৰিষদৰ সভানেত্ৰী ললিতা ৰাভা আৰু কামৰূপ জিলা ষষ্ঠ অনুসূচী দাবী সমিতিৰ সভাপতি বিদ্যা ৰাভাই ৷
ৰাভা দিৱসৰ লগত সংগতি ৰাখি অনুষ্ঠিত কৰা হয় এখন মুকলি সভা আৰু সদ্যঘোষিত হাইস্কুল শিক্ষান্ত পৰীক্ষা আৰু উচ্চতৰ মাধ্যমিক পৰীক্ষাত প্ৰথম বিভাগত উত্তীৰ্ণ হোৱা স্ব-গোষ্ঠীয় ছাত্ৰ-ছাত্ৰীক সম্বৰ্ধনা জনোৱা হয় । ৰাভা হাছং স্বায়ত্তশাসিত পৰিষদৰ কামৰূপ জিলাৰ অন্তৰ্গত ১১০ গৰাকী হাইস্কুল শিক্ষান্ত পৰীক্ষাৰ আৰু ৩৫ গৰাকী উচ্চতৰ মাধ্যমিক বিদ্যালয় পৰীক্ষাত প্ৰথম বিভাগত উত্তীৰ্ণ হোৱা ছাত্ৰ ছাত্ৰীক কামৰূপ জিলা ৰাভা ছাত্ৰ সন্থা, মহিলা পৰিষদ আৰু ষষ্ঠ অনুসূচী দাবী সমিতিৰ তৰফৰ পৰা মানপত্ৰ, এডালকৈ গছপুলি, এখন ৰাভা সকলৰ 'পাজাৰ' তথা এখনকৈ ৰাভা অভিধান 'ছামলায়চিনি ৰাওছামি' প্ৰদান কৰা হয় ।