ৰঙিয়া,১২ আগষ্ট:পুনৰ আহিল উচ্ছেদৰ জাননী । ৰঙিয়া সমষ্টিৰ অন্তৰ্গত তথা বিটিআৰৰ অধীনস্থ ধূলাবড়িত কেইবাটাও পৰিয়াললৈ আহিছে উচ্ছেদৰ জাননী । শুকুৰবাৰে ABMSU য়ে উচ্ছেদৰ জাননীৰ বিৰুদ্ধে সাব্যস্ত কৰে তীব্ৰ প্ৰতিবাদ । বিটিআৰ প্ৰশাসনে অন্যায়ভাৱে উচ্ছেদ কৰিবলৈ ওলোৱাৰ অভিযোগ উত্থাপন কৰি এ বি এম ছুৱে দলংঘাটত ৰাজহুৱা প্ৰতিবাদী সভা অনুষ্ঠিত কৰি উচ্ছেদ প্ৰক্ৰিয়াৰ বিৰোধিতা কৰে ।
চৰকাৰ বিৰোধী শ্ল'গানেৰে প্ৰতিবাদকাৰীসকলে পৰিৱেশ উত্তাল কৰি তোলে । উল্লেখ্য যে শেহতীয়াভাৱে ট্ৰাইবেল বেল্ট এণ্ড ব্লকত অবৈধভাৱে দখল কৰা বুলি ধূলাবড়ি অঞ্চলৰ ২১ টা পৰিয়াললৈ গোৰেশ্বৰ ৰাজহ চক্ৰ কাৰ্যালয়ৰ ফালৰ পৰা উচ্ছেদৰ জাননী প্ৰেৰণ কৰা হৈছে ।
এই জাননীৰ পিছতে পৰিয়ালসমূহৰ মাজত হাহাকাৰ লাগে । উক্ত উচ্ছেদৰ জাননীক অমানৱীয় আখ্যা দি এবিএমছুৰ তামুলপুৰ জিলা সমিতিৰ সভাপতি বদৰুদ্দিন খানে শীঘ্ৰে এনে জাননী প্ৰত্যাহাৰ কৰিবলৈ দাবী জনায় । বিটিচি চুক্তিৰ পূৰ্বৰ পৰা এইসকল লোকে বসবাস কৰি আহিছে বুলি দাবী কৰে ।