বাইহাটা,১৭ জুলাই: গুৱাহাটীৰ পৰা মাত্ৰ ৩৫ কিলোমিটাৰ নিলগত বাইহাটা চৰিআলিৰ অন্তৰ্গত মুক্তাপুৰ আমৰ তল-মনুৰ সংযোগী গ্ৰাম্য পথটোৰ বিধ্বস্ত ৰূপৰ বাবে সাধাৰণ ৰাইজে জ্বলা-কলা খাব লগীয়া হৈছে। এজাক বৰষুণতে পুখুৰী সদৃশ হৈ পৰে এই পথটো। বাৰম্বাৰ আবেদন কৰাৰ পাচতো জনপ্ৰতিনিধিয়ে পথটো মেৰামতি নকৰাৰ ৰাইজে আজি পথটোত ভূঁই ৰুই প্ৰতিবাদ সাব্যস্ত কৰে।
অঞ্চলটোৰ প্ৰায় ১৫ খন গাঁৱৰ মানুহ অহা যোৱা কৰা পথটোৰ দুৰৱস্থাৰ বাবে ৰাইজে অতিৰিক্তভাৱে ৰাষ্ট্ৰীয় ঘাই পথলৈ বহু দূৰ ঘূৰি যাবলগীয়া হয় । ইপিনে পথটোৰ দুৰৱস্থাৰ বাবে ঠেলাৰে ৰোগীক চিকিৎসালয়লৈ নিব লাগে বুলিও অভিযোগ কৰে স্থানীয় ৰাইজে। ইয়াৰোপিও কণ কণ ছাত্ৰ ছাত্ৰী সকলে বিপদ সংকুল ভাৱে বিদ্যালয়লৈ যাবলগীয়া হয়। ৰাইজৰ অভিযোগ অনুসৰি ৰজাঘৰীয়াৰ ওচৰত অঞ্চলবাসীয়ে বাৰম্বাৰ আবেদন কৰাৰ পিচতো চকু মেল নোখোৱাত অঞ্চলটোৰ ৰাইজে পথত ভূঁই ৰুই প্ৰতিবাদ সাব্যস্ত কৰে। লগতে বিধায়ক সত্যব্ৰত কলিতাই পথটো পুনৰ নিৰ্মাণৰ ক্ষেত্ৰত কোনো ধৰণৰ মনোযোগ নিদিয়াৰো অভিযোগ স্থানীয় ৰাইজে। সেয়ে প্ৰতিবাদকাৰী সকলে অসম চৰকাৰ হায় হায়,গড়কাপ্তানী বিভাগ হায় হয় আদি বিভিন্ন চৰকাৰ বিৰোধী ধ্বনিৰে উত্তাল কৰি তুলে সমগ্ৰ পৰিৱেশ।