ৰঙিয়া, 16 জুন : ৰঙিয়াৰ চেপ্তীত অসম গ্ৰামীণ বিকাশ বেংকৰ অতি ক্ষুদ্ৰ শাখাত পুৱা সৃষ্টি হয় উত্তপ্ত পৰিস্থিতিৰ ৷ শাখাটোৰ অপাৰেটৰগৰাকীয়ে টকা প্ৰদানৰ নামত গাফিলতিৰ কৰাৰ অভিযোগত গ্ৰাহকে কাৰ্যালয়টো ঘেৰাও কৰি সাব্যস্ত কৰে প়্ৰতিবাদ ৷
চেপ্তীৰ অসম গ্ৰামীণ বিকাশ বেংকৰ অতি ক্ষুদ্ৰ শাখাত টকা উলিয়াবলৈ পুৱা 6 বজাৰ পৰা শাৰী পাতি পাতি আছিল প্ৰায় দুই শতাধিক মহিলাই । কিন্তু শাৰী পাতি ৰৈ থকা মহিলাক টকা দিয়াৰ পৰিবৰ্তে শাখাটোৰ অপাৰেটৰগৰাকীয়ে বহু পিছত অহা নিজৰ আত্মীয় তথা চিনাকি মহিলাক টকা দিয়ে । অপাৰেটৰগৰাকীৰ এনে মইমতালিৰ বিৰুদ্ধে ক্ষুণ্ণ হৈ পৰে বাকী মহিলাসকল ৷ ইয়াৰ ফলত শাখাটোত এক হুলস্থুলীয়া পৰিবেশৰ সৃষ্টি হয় ।
উল্লেখ্য যে, লকডাউনৰ সময়ত মহিলাসকলক কেন্দ্ৰীয় চৰকাৰৰ তৰফৰ পৰা সাহাৰ্য আগবঢ়োৱা হৈছে । সাহাৰ্যৰ টকা উলিয়াবলৈ পুৱাৰে পৰা শাৰী পাতি আছিল মহিলাসকল । কিন্তু অসম গ্ৰামীণ বিকাশ বেংকৰ অতি ক্ষুদ্ৰ শাখাটোৰ অপাৰেটৰ গৰাকীয়ে কোনো নিয়ম-কানুন নামানি নিজ মইমতালিৰে টকা আদায় দিয়াত সৃষ্টি হয় উত্তপ্ত পৰিস্থিতিৰ ৷ গ্ৰাহকৰ ৰুদ্ৰমূৰ্তি দেখি বেংকৰ শাখাটো বন্ধ কৰি পলায়ন কৰে শাখাটোৰ অপাৰেটৰ গৰাকীয়ে । পিছত সংবাদ মাধ্যমৰ লোক উপস্থিত হোৱাত অপাৰেটৰ গৰাকীয়ে শাখাটো গ্ৰাহকৰ বাবে পুনৰ খুলি দিয়ে ।