চাংসাৰীত সমাজ কল্যান বিভাগৰ পোষণ মেলা

বড়োলেণ্ডক কেন্দ্ৰীয় শাসিত অঞ্চল হিচাপে বিচৰাৰ কোনো চিন্তাই কৰা নাই বি পি এফ দলৰ নেতৃত্বই । চাংসাৰীত এই মন্তব্য প্ৰমীলা ৰাণী ব্ৰহ্মৰ ৷ চাংসাৰীত অনুষ্ঠিত সমাজ কল্যান বিভাগৰ পোষণ মেলাত প্ৰমীলা ৰাণী ৷ সমুহীয়া অন্ন-প্ৰসন্ন অনুষ্ঠানতো অংশ মন্ত্ৰীগৰাকীৰ

চাংসাৰী, 10 আগষ্ট : বড়োলেণ্ডক কেন্দ্ৰীয় শাসিত অঞ্চল হিচাপে দাবী কৰাৰ বৰ্তমান কোনো পৰিকল্পনা নাই বি পি এফ দলৰ । বড়োলেণ্ডক কেন্দ্ৰীয় শাসিত অঞ্চল হিচাপে বিচৰাৰ কোনো চিন্তাই কৰা নাই বি পি এফ দলৰ নেতৃত্বই । ৰাজ্যসভাত কাশ্মীৰৰ 370 ধাৰা প্ৰত্যাহাৰৰ প্ৰসংগ উত্থাপন হোবাৰ সময়ত সাংসদ বিশ্বজিৎ দৈমাৰীয়ে নিয়মমাফিক উত্থাপন কৰিছিল বড়োলেণ্ডক কেন্দ্ৰীয় শাসিত অঞ্চল ঘোষনাৰ দাবী । কামৰূপ জিলাৰ চাংসাৰীত এই চাঞ্চল্যকৰ মন্তব্য কৰে সমাজকল্যান মন্ত্ৰী তথা জেষ্ঠ বিপিএফ নেত্ৰী প্ৰমীলা ৰাণী ব্ৰহ্মই । কামৰূপ জিলা সমাজ কল্যাণ বিভাগৰ পৰা চাংসাৰী হালোগুড়িত অনুষ্ঠিত পোষণ মেলাত উপস্থিত থাকি মন্ত্ৰী প্ৰমীলাই বড়োলেণ্ডক কেন্দ্ৰীয় শাসিত অঞ্চল হিচাপে পাবলৈ বেলেগ পৰিস্থিতিৰ সৃষ্টি কৰিব লাগিব বুলিও তাৎপৰ্যপূৰ্ণ মন্তব্য আগবঢ়ায় । ভবিষ্যতে পৃথক বড়োলেণ্ডৰ দাবী উত্থাপন কৰিব লাগিলে বড়োভূমিৰ সকলো জাতি জনগোষ্ঠীক লগত লৈ এই দাবী উত্থাপন কৰিব বুলিও মত প্ৰকাশ কৰে মন্ত্ৰী প্ৰমীলা ৰাণী ব্ৰহ্মই । ইফালে, এই পোষান মেলাত মন্ত্ৰীগৰাকীয়ে এক সমুহীয়া অন্ন প্ৰসন্ন অনুষ্ঠানত অংশগ্ৰহণ কৰে । বৃহত্তৰ অঞ্চলটোৰ অৰ্ধশতাধিক শিশুক মন্ত্ৰীগৰাকীয়ে প্ৰথম আহাৰ পৰিবেশন কৰায় । মন্ত্ৰীগৰাকীৰ লগতে কামৰূপ জিলাৰ উপায়ুক্ত কমল কুমাৰ বৈশ্য আৰু মন্ত্ৰী হিমন্ত বিশ্ব শৰ্মাৰ প্ৰতিনিধি হেমন্ত চৌধুৰীয়ে এই সমুহীয়া অন্নপ্ৰসন্ন অনুষ্ঠানত অংশগ্ৰহন কৰে । ইয়াৰ পাছতে পোষণ মেলাৰ মুকলি সভাত মন্ত্ৰী প্ৰমীলা ৰাণী ব্ৰহ্মই অংশগ্ৰহণ কৰি শিশু -মাতৃ সকলে যাতে প্ৰয়োজনীয় পুষ্টি লাভ কৰে তাৰ প্ৰতি চোকা নজৰ ৰাখিবলৈ অংগনবাড়ী কৰ্মীসকলক আহ্বান জনায় । অনুষ্ঠানত জিলা উপায়ুক্ত কমল কুমাৰ বৈশ্যই ভাষন প্ৰসংগত প্ৰধানমন্ত্ৰী নৰেন্দ্ৰ মোদীয়ে শিশু-মাতৃ সকলৰ পৰিপুষ্টিৰ বাবে যি আচনি গ্ৰহণ কৰিছে সেয়া প্ৰতিগৰাকী শিশু -মাতৃয়ে যেন লাভ কৰে তাৰ প্ৰতি সমাজ কল্যাণ বিভাগে নজৰ দিয়া প্ৰয়োজন বুলি উল্লেখ কৰে । অনুষ্ঠানত সমাজকল্যান বিভাগৰ সঞ্চালক জুৰি ফুকন, জিলা সমাজকল্যান বিষয়া ৰুবুল শৰ্মাও উপস্থিত থাকে ।