ৰঙিয়া, 11 মাৰ্চঃকালৰ গৰাহত দ্বিতীয় বিশ্বযুদ্ধৰ স্মৃতিৰ কঢ়িয়াই লৈ ফুৰা ৰঙিয়াৰ এটি বৌদ্ধ স্তুপ ৷ ক্ৰমাৎ ধ্বংসৰ দিশে গতি কৰিছে দ্বিতীয় বিশ্বযুদ্ধৰ সময়ৰ অসমত থকা স্মৃতি চিহ্নসমূহ ৷ তাৰ ভিতৰত আছে ৰঙিয়াৰ বাৰ্মিজ নগৰত থকা এটা বৌদ্ধ স্তুপ ৷
উল্লেখ্য যে, ব্ৰিটিছৰ সৈতে যুদ্ধ কৰিবলৈ অহা মিত্ৰবাহিনীৰ বাৰ্মিজ সৈন্যৰ এটা দলে সেই সময়ত ৰঙিয়াত প্ৰায় ডেৰবছৰ কাল বাহৰ পাতি আছিল । সেই সময়তে তেওঁলোকে আৰাধ্য দেৱতাক স্তুতি কৰিবলৈ ৰঙিয়াৰ বাৰ্মিজ নগৰত নিৰ্মাণ কৰিছিল এটা বৌদ্ধ স্তুপৰ । কিন্তু অতি পৰিতাপৰ বিষয় যে, বৰ্তমান পৰিত্যক্ত অৱস্থাত পৰি আছে বৌদ্ধ স্তুপটো ৷ ৰঙিয়াত বৌদ্ধ ধৰ্মাৱলম্বী লোক নাই বাবে মানুহৰ সমাগম নহয় এই স্তুপটোত । আনকি বৰলীয়া নৈৰ পাৰত গম্বুজ সদৃশ থিয় হৈ থকা তথা ঐতিহ্য বহন কৰি অহা স্তুপটোৰ বিষয়ে বহুলোকেই অজ্ঞ । স্তুপটোৰ কাষত নাই এখন নামফলক, নাই কোনো সংৰক্ষণৰ ব্যৱস্থা । স্থানীয় কেইগৰাকীমান যুৱকে স্তুপটো সংৰক্ষণৰ চেষ্টা কৰিছে যদিও সেয়া পৰ্যাপ্ত নহয় ।