ডিমৰীয়া, 27 জুন: ডিমৰীয়া উন্নয়ণ খণ্ডৰ অন্তৰ্গত হহৰা গাওঁ পঞ্চায়ত আৰু তেতেলীয়া গাওঁ পঞ্চায়তৰ অন্তৰ্গত তেতেলীগুৰি পথৰ পৰা মিটনী জগন্নাথ মন্দিৰ আৰু হহৰা সংযোগী পথৰ নিৰ্মাণ কাৰ্যই এতিয়া সকলোৰে চকু কপালত তুলিছে । প্ৰধানমন্ত্ৰী গ্ৰাম চড়ক যোজনাৰ অধীনত পথটিৰ নিৰ্মাণ কৰিছিল,কিন্তু পথটি নিৰ্মাণ কৰাৰ পিছতে পথটিৰ পৰা চপৰা চপৰে খহিছে ব্লেক টেপিং। কিয়নো একাংশ দালালৰূপী ঠিকাদাৰৰ কামৰ নমুনাই সচেতন ৰাইজক বিমুখ কৰা দেখা গৈছে ।
চৰকাৰৰ দুৰ্নীতিমুক্ত শ্লোগানক ভেঙুচালি কৰি প্ৰধানমন্ত্ৰী গ্ৰাম চড়ক যোজনাৰ অধীনত অহা পুজিৰ কোটি কোটি টকা একাংশ গড়কাপ্তানী বিভাগৰ আশীষ প্ৰাপ্ত বিষয়া ঠিকাদাৰে আত্মসাত কৰা দৃষ্টিগোচৰ হৈছে যদিও এই ক্ষেত্ৰত নিমাত হৈ আছে প্ৰশাসন, সেয়াও ৰহস্যজনক হৈ পৰা পৰিলক্ষিত হৈছে । অভিযোগ অনুসৰি শাসকীয় চৰকাৰৰ বহু নেতা পালিনেতাৰ ঘনিষ্ঠ হোৱাৰ বাবেই ঠিকাদাৰ হেমন্ত ভাগৱতীয়ে ডিমৰীয়া অঞ্চলৰ বহু সংখ্যক পথ নিৰ্মাণৰ কামৰ দায়িত্ব লাভ কৰিছে কিন্তু দেখা গৈছে যে কামৰ নামত কেইটামান শিলগুটি আৰু নিম্নমানৰ ব্লেক টেপিং ব্যৱহাৰ কৰি কাম সম্পূৰ্ণ কৰিছে, কাৰপেটিংৰ নামত কেৱল নামমাত্ৰ শিলগুটি আৰু আলকাতৰা ব্যৱহাৰ কৰা হৈছে যাৰ ফলত নৱনিৰ্মিত পথটিত এতিয়া তৰপে তৰপে এৰাই গৈছে ব্লেক টপিং । সচেতন ৰাইজে এই ক্ষেত্ৰত কনিষ্ঠ অভিযন্তাৰ ওচৰত অভিযোগ দাখিল কৰিছিল যদিও কোনো ধৰণৰ সঁহাৰি লাভ নকৰিলে ।
ৰাইজে এতিয়া এটাই আশা কৰিছে যে পৰিৱৰ্তনকামী চৰকাৰৰ সততে ৰাস্তা-ঘাটৰ উন্নয়নৰ কথা কোৱা গড়কাপ্তানী বিভাগৰ মন্ত্ৰী ডঃ হিমন্ত বিশ্বশৰ্মাই এই ক্ষেত্ৰত বিশেষ পদক্ষেপ গ্ৰহণ কৰিব ঠিকাদাৰ আৰু বিষয়াসকলৰ বিৰুদ্ধে।