ৰঙিয়াত বিদ্যুতৰ খুঁটা পৰি থিতাতে নিহত যুৱক

বানৰ মাজতে বিদ্যুতৰ খুটা পৰি থিতাতে নিহত হয় এজন যুৱক ৷ উক্ত ঘটনাটোৰ বাবে এতিয়া তীব্ৰ চাঞ্চল্যৰ সৃষ্টি হৈছে সমগ্ৰ অঞ্চলটোত ৷

ৰঙিয়া, 12 জুলাইঃ প্ৰলয়ংকাৰী বানৰ মাজতে ৰঙিয়াত সংঘটিত হয় শোকাবহ এটা ঘটনা ৷ বিদ্যুৎ বিভাগৰ খুঁটা পৰি থিতাতে নিহত এজন যুৱক ৷

প্ৰলয়ংকাৰী বানৰ মাজতে ৰঙিয়া মহকুমাধিপতি পথৰ শৌলমাৰীত বিদ্যুৎ বিভাগৰ লাইনৰ খুঁটা পৰি থিতাতে নিহত যুৱক । নিহত যৱকজন হৈছে ৰঙিয়াৰ হিৰাগাটাৰ জহৰ আলী (৩৪) । দিন হাজিৰা কৰা জহৰ আলীয়ে কাম শেষ কৰি ঘৰলৈ ওভতাৰ সময়তে সংঘটিত হয় এই দূৰ্ঘটনা । উল্লেখ্য যে, প্ৰলয়ংকাৰী বানৰ সোঁতত উভালি পৰে বিদ্যুতৰ খুঁটাটো । এবুকু পানীৰ মাজেৰেই ঘৰলৈ গৈ আছিল জহৰ আলী । বিদ্যুতৰ পকী খুঁটাটো জহৰৰ গাৰ ওপৰতে হঠাৎ পৰি যোৱাত কৰুণভাবে মৃত্যুক আকোৱালি লয় যুৱকজনে । স্থানীয় লোকে কোনোমতে বানৰ প্ৰবল সোঁতৰ পৰা মৃতদেহটো উদ্ধাৰ কৰে ।

উল্লেখযোগ্য যে, ৰঙিয়াৰ মহকুমাধিপতিৰ কাৰ্যালয়লৈ যোৱা গড়কাপ্তানী পথটোত বৰ্তমান এবুকু পানী । ৰাইজে এবুকু পানীৰ মাজেৰেই বিপদ সংকুলভাবে যাতায়ত কৰিবলৈ বাধ্য হৈছে যদিও প্ৰশাসনৰ ফালৰ পৰা বৰ্তমানেলৈকে কোনো উপযুক্ত ব্যৱস্থা লোৱা নাই বুলি তীব্ৰ ক্ষোভ প্ৰকাশ কৰিছে স্থানীয় লোকসকলে ।

লগতে পঢ়ক-ক্ৰমাৎ শোচনীয় হৈছে কমলপুৰৰ বান পৰিস্থিতি