ৰঙিয়া, 23 নৱেম্বৰঃ ৰঙিয়াত ১০ বছৰে ধৰি যমৰ- যাতনাৰে যাতায়াত অব্যাহত ৰাখিছে স্কুলীয়া ছাত্ৰ-ছাত্ৰীৰ লগতে সাধাৰণ ৰাইজে ৷ স্থানীয় ৰাইজে বাঁহৰ দলং নিৰ্মাণ কৰিয়েই বিপদসংকুল যাতায়াত কৰিবলগীয়া হৈছে ৷
বিকশিত অসমৰ আন এক পুতৌ লগা ছবি । ৰঙিয়াৰ দ্বাৰকুছিত ১০ বছৰ পূৰ্বে প্ৰলয়ংকাৰী বানত ভাঙি যোৱা কাঠৰ দলং এখন আজিও নিৰ্মাণ কৰা নহ'ল । যাৰ বাবে ৰঙিয়া আৰু তামুলপুৰ সমষ্টিৰ সহস্ৰাধিক লোকে যাতায়তৰ নামত জীয়াতু ভুগি আহিছে । ১০ বছৰ পূৰ্বে বৰলীয়া নৈৰ সংহাৰী বানে পথটোত থকা কাঠৰ দলংখনৰ আধা আধা অংশ উটুৱাই নিয়ে । তেতিয়াৰ পৰা ৰঙিয়া আৰু তামুলপুৰ সমষ্টিৰ সহস্ৰাধিক লোকে যাতায়তৰ নামত দুৰ্ভোগ ভুগি আহিছে।
উল্লেখ্য যে, দলংখন নিৰ্মাণ কৰাৰ বাবে ৰাইজে বহুবাৰ আবেদন-নিবেদন কৰিলে যদিও বিভাগীয় কৰ্তৃপক্ষই উক্ত বিষয়টোৰ ওপৰত কোনো গুৰুত্ব নিদিলে । দুটা সমষ্টিৰ সীমা অঞ্চল হোৱা বাবে দুয়োটা সমষ্টিৰ বিধায়ক দুগৰাকীয়েও দলংখন নিৰ্মাণ কৰাৰ ক্ষেত্ৰত গুৰুত্ব নিদিয়াত ৰাইজৰ মাজত ক্ষোভৰ সৃষ্টি হৈছে । উপায়ন্তৰ হৈ ৰাইজে এখন বাঁহৰ দলং নিৰ্মাণ কৰিয়েই যাতায়তৰ কৰি থাকিবলগীয়া হৈছে । কিন্তু অতি দুৰ্বল এই বাঁহৰ দলং খনেৰে চলাচল কৰাটো পথচাৰীৰ বিপজ্জনক হৈ পৰিছে । বিশেষকৈ শিশু, মহিলা, বৃদ্ধ, ৰুগীয়া লোকে মৰণক শৰণ দি বিপদ সংকুলভাৱে পাৰ হয় এই বাঁহৰ দলং খনেৰে ৷ অতি শীঘ্ৰে চৰকাৰ তথা প্ৰশাসনক উক্ত পথটোত এখন পকী দলং নিৰ্মাণ কৰি দিবলৈ আহ্বান জনাইছে বিভিন্ন দল সংগঠনৰ লগতে স্থানীয় ৰাইজে ৷