আদালতত হাজিৰ মূল্যায়ন কেলেংকাৰীৰ দুই অভিযুক্তক

মূল্যায়ন কেলেংকাৰীৰ সৈতে জড়িত থকাৰ অপৰাধত আটক কৰা দুই অভিযুক্তক মঙলবাৰে আদালতত হাজিৰ কৰা হয় ৷ দুই অভিযুক্তক দুদিনৰ বাবে জিম্মাত লৈছিল কামৰূপ আৰক্ষীয়ে ৷

বাইহাটা, 20 জুলাই : ৰাজ্য কঁপোৱা HSLC পৰীক্ষাৰ মূল্যায়ন কেলেংকাৰীত জড়িত দুই অভিযুক্তক মঙলবাৰে কামৰূপ জিলাৰ মুখ্য ন্যায়াধীশৰ আদালতত হাজিৰ কৰোৱা হয় । কামৰূপ জিলাত সংঘটিত মূল্যায়ন কেলেংকাৰীত জড়িত দুই অভিযুক্তক আটক কৰাৰ পাচতে দুদিনৰ বাবে নিজৰ জিম্মাত লৈছিল আৰক্ষীয়ে ৷ আদালতত হাজিৰ কৰোৱাৰ পৰৱৰ্তী সময়ত অভিযুক্তক কাৰাগাৰলৈ প্ৰেৰণ কৰা হয় বুলি জানিব পৰা গৈছে ৷

এই দুই অভিযুক্ত আছিল ক্ৰমে কামৰূপ জিলা বিদ্যালয়সমূহৰ পৰিদৰ্শক কাৰ্যালয়ৰ কম্পিউটাৰ সহায়ক প্ৰশান্ত দাস আৰু মাজৰটোপ উচ্চতৰ মাধ্যমিক বিদ্যালয়ৰ অধ্যক্ষ আক্কাছ আলী আহমেদ ৷ আদালতত হাজিৰ কৰাৰ পূৰ্বে দুই অভিযুক্তই সাংবাদিকৰ আগত কয়, তেওঁলোক নিৰ্দোষী ৷ আদালতৰ ওপৰত আস্থা ৰাখিছে, আদালতে সকলো বিচাৰ কৰিব বুলি মন্তব্য প্ৰকাশ কৰে দুই অভিযুক্তই ৷

উল্লেখ্য যে, মূল্যায়ন কেলেংকাৰীৰ ৰাজসাক্ষী হ'ব ছেবাৰ সমন্বয়ক ফুলপাহী নাথ । কামৰূপ আৰক্ষীয়ে ফুলপাহী নাথক ৰাজসাক্ষীৰ কৰাৰ যাৱতীয় কাম-কাজ সম্পন্ন কৰিছে । আনফালে কামৰূপ আৰক্ষীয়ে গ্ৰেপ্তাৰ কৰা কামৰূপ জিলা বিদ্যালয়সমূহৰ পৰিদৰ্শক কাৰ্যালয়ৰ কৰ্মচাৰী প্ৰশান্ত দাসক চাকৰি পৰা নিলম্বন কৰিছে শিক্ষা বিভাগে ।

প্ৰশান্ত দাস আছিল কাৰ্যালয়টোৰ ঠিকা ভিত্তিত নিযুক্তি লাভ কৰা এগৰাকী কৰ্মচাৰী । একেদৰে গৰৈমাৰী মাজৰটোপ উচ্চতৰ মাধ্যমিক বিদ্যালয়ৰ অধ্যক্ষ আক্কাচ আলী আহমেদকো ইতিমধ্যে চাকৰিৰ পৰা নিলম্বন কৰিছে শিক্ষা বিভাগে । কিছু সোধ-পোচৰ বাবে আটক কৰা হবিবুৰ ৰহমান আৰু চতুৰ্থ বৰ্গৰ কৰ্মচাৰী শিৱেশ্বৰ কলিতাক বিচাৰিলেই তদন্তকাৰী আৰক্ষীৰ বিষয়া ওচৰত হাজিৰ হ'বলৈ নিৰ্দেশ দিয়া হৈছে ৷

ইফালে, মূল্যায়ন কেলেংকাৰীৰ উচ্চ পৰ্যায়ৰ তদন্তৰ দাবী কৰিছে কামৰূপ জিলা ছাত্ৰ সন্থাই । কামৰূপ জিলা ছাত্ৰ সন্থা বিষয়ববীয়া অভিযোগ অনুসৰি এই কেলেংকাৰী লগত জড়িত বহু শীৰ্ষ পৰ্যায়ৰ বিষয়া আইনৰ সুৰুঙাৰে বাচি গৈছে ৷ এই কেলেংকাৰীৰ সৈতে ব্যাপক চৰ্চা লাভ কৰা কামৰূপৰ জিলা বিদ্যালয় সমূহৰ পৰিদৰ্শক মাধৱ ডেকাক পুৰষ্কৃত কৰি পদোন্নতি দিয়া কাৰ্যক শিক্ষা সমাজৰ বাবে লজ্জাজনক ঘটনাৰ আখ্যা দিয়ে কামৰূপ জিলাৰ ছাত্ৰ সন্থাই ।

লগতে পঢ়ক: পেগাচাছ স্পাইৱেৰ: অমিত শ্বাহক বৰ্খাস্তৰ দাবী কংগ্ৰেছৰ