নাগাৰা নামৰ একান্ত সাধক ৰূপেন্দ্ৰ নাথ ডেকালৈ শিল্পী পেঞ্চন

অসম নাগাৰা নাম সংঘৰ অন্যতম প্ৰতিষ্ঠাপক তথা কামৰূপ জিলাৰ কমলপুৰ সমষ্টিৰ হাহাৰা গাঁৱৰ ৰূপেন্দ্ৰ নাথ ডেকালৈ ৰাজ্য চৰকাৰে আগবঢ়াইছে শিল্পী পেঞ্চন, বিজতৰীয়া অপসংস্কৃতি নেগেৰা নামত সংযোজিত কৰি গুৰুজনাক একাংশই অপমান কৰিছে বুলি মন্তব্য শিল্পী গৰাকীৰ

কামৰূপ, 14 আগষ্টঃ অসম নাগাৰা নাম সংঘৰ অন্যতম প্ৰতিষ্ঠাপক তথা কামৰূপ জিলাৰ কমলপুৰ সমষ্টিৰ হাহাৰা গাঁৱৰ ৰূপেন্দ্ৰ নাথ ডেকালৈ ৰাজ্য চৰকাৰে আগবঢ়াইছে শিল্পী পেঞ্চন । প্ৰায় 42 বছৰ ধৰি অব্যাহত ৰখা নাগাৰা নামৰ একান্ত সাধক গৰাকীক ৰাজ্য চৰকাৰে শেষতীয়াভাৱে স্বীকৃতি প্ৰদান কৰাত স্বাভাৱিকতে উৎফুল্লিত হৈ পৰিছে অঞ্চলবাসী । উল্লেখযোগ্য যে, ষষ্ঠ শ্ৰেণীত পঢ়ি থকা সময়তে সংস্কৃতিৰ পথাৰত ভৰি দিয়া শিল্পী গৰাকীয়ে 1971 চনৰ পৰা ধাৰাবাহিক ভাৱে নাগাৰা নাম পৰিবেশনেৰে সংস্কৃতি প্ৰেমী ৰাইজৰ মন জয় কৰি আহিছে ৷ সেয়ে শিল্পী গৰাকীলৈ আগবঢ়োৱা স্বীকৃতিৰ বাবে ৰাজ্য চৰকাৰক তেওঁ ধন্যবাদ জ্ঞাপন কৰাৰ লগতে নাগাৰা নামে শেহতীয়াকৈ মৌলিকতা হেৰুৱাই পেলাইছে বুলি মন্তব্য কৰে ৷ ইয়াৰোপৰি তেওঁ কয় যে , নৱ প্ৰজন্মৰ শিল্পী সকলে নাগাৰা নামৰ সৈতে কিছুমান বিজতৰীয়া অপসংস্কৃতি সংযোজিত কৰি গুৰুজনাক অপমান কৰিছে বুলিও অভিযোগ কৰে ৷