ছয়গাঁও,৭ছেপ্টেম্বৰ : কৰ’ণা মহামাৰীৰ বাবে চলিত বৰ্ষত নামনি অসমৰ যাত্ৰাদল সমূহৰ নাট প্ৰদৰ্শন বন্ধ হৈ পৰিছিল ৷ যাৰ বাবে বহু অসুবিধাৰ সন্মুখীন হ’ব লগা হৈছে যাত্ৰা দল সমূহৰ শিল্পী, কলা-কুশলীৰ লগতে প্ৰযোজক সকল ৷ বৰ্তমানেও কৰ’ণাৰ সংক্ৰমণ ৰোধ নোহোৱাৰ ফলত এই বৰ্ষত যাত্ৰাদল সমূহে নাট প্ৰদৰ্শন কৰা নকৰাটোক লৈ এতিয়াও যাত্ৰাৰ শিল্পী, কলা-কুশলীৰ লগতে প্ৰযোজক সকলে চৰম অনিশ্চয়তাত দিন কটাবলগীয়া হৈছে ৷ উপাৰ্জনৰ পথ বন্ধ হোৱাৰ ফলত তেওঁলোকৰ মাজত দেখা দিছে আৰ্থিক সমস্যাই ৷ আনহাতে, এতিয়ালৈকে যাত্ৰাৰ শিল্পী সকলে চৰকাৰৰ পৰাও লাভ কৰা নাইকোনো ধৰণৰ সহায় সাহায্য ৷
এনে সময়তেই, ছয়গাঁও সমষ্টিৰ বিধায়ক ৰেকিবুদ্দিন আহমেদে ৩১ গৰাকী শিল্পী আৰু কলা-কুশলীক প্ৰদান কৰিছে খাদ্য-সামগ্ৰী ৷ সোমবাৰে ছয়গাঁৱৰ আৰাধনা নাট্য দলৰ আখৰা গৃহত বিধায়ক গৰাকীৰ হৈ নাট্য দলটোৰ প্ৰযোজক দেবেশ্বৰ তালুকদাৰ আৰু বিষ্ণু-জ্যোতি নাট্যগোষ্ঠীৰ প্ৰযোজক বিপুল দাসে শিল্পী আৰু কলা-কুশলী সকলৰ মাজত খাদ্য সামগ্ৰীৰ ৩১ টা টোপোলা বিতৰণ কৰে ৷