পলাশবাৰী, 24 চেপ্তেম্বৰঃমঙলবাৰে পলাশবাৰী পৌৰসভা কাৰ্যালয়ত উপস্থিত হয় অসম চৰকাৰৰ নগৰ উন্নয়ন মন্ত্ৰী পীযুষ হাজৰিকা ৷ ৰাষ্ট্ৰীয় সেউজ প্ৰাধিকৰণৰ অধীনত চলি থকা কামৰ খতিয়ান ল'বলৈ স্থানীয় বিধায়ক প্ৰনৱ কলিতাৰ সৈতে এইদৰে পৌৰসভা কাৰ্যালয়ত উপস্থিত হয় মন্ত্ৰীগৰাকী ৷
পৌৰসভা কাৰ্যালয়ত উপস্থিত হৈয়ে কাৰ্যালয়ত চলি অহা বিত্তীয় খেলিমেলি সন্দৰ্ভত স্পষ্টীকৰণ বিছাৰে মন্ত্ৰীগৰাকীয়ে ৷ কেন্দ্ৰ আৰু ৰাজ্য চৰকাৰে প্ৰদান কৰা ধনৰ উপযুক্ত খৰচ কৰিব নোৱাৰাৰ বাবে পৌৰপতি ৰাতুল শৰ্মাৰ লগতে নগৰ প্ৰকল্প বিষয়া চন্দন বৈশ্যক ধমক দিয়ে মন্ত্ৰীগৰাকীয়ে ৷ 2013 বিত্তীয় বৰ্ষৰ লগতে অন্যান্য বিত্তীয় বৰ্ষসমূহকে ধৰি পলাশবাৰী পৌৰসভা কাৰ্যালয়ে লাভ কৰা প্ৰায় 80 লাখ টকা খৰচ নকৰাকৈ এনেদৰেই ৰখাই থোৱা হৈছিল ৷
ৰাষ্ট্ৰীয় সেউজ প্ৰাধিকৰণৰ নিৰ্দেশত অসমৰ 9 খন পৌৰসভাক মডেল পৌৰসভালৈ উন্নীত কৰাৰ নিৰ্দেশনা আছিল ৷ আগন্তুক 2 অক্টোবৰৰ ভিতৰত স্বচ্ছ ভাৰত অভিযানৰ অধীনত অসমৰ 9খন পৌৰসভাক প্ৰদান কৰা হৈছিল বিশেষ কৰ্তৃত্ব ৷ ইয়াৰ ভিতৰত পলাশবাৰী পৌৰসভাও অন্যতম আছিল আৰু ইয়াত হাইমাষ্ট লাইটকে ধৰি ঘৰে ঘৰে গৈ জাৱৰ সংগ্ৰহ কৰা, জাৱৰ নিষ্কাশণ কৰা আদি কামৰ দায়িত্ব অৰ্পন কৰা হৈছিল ৷ কিন্তু ছটা হাইমাষ্ট লাইটৰ বাহিৰে এতিয়ালৈকে অন্যান্য কামসমূহ সম্পন্ন কৰিব পৰা নাই পৌৰসভাই ৷ আনহাতে মন্ত্ৰী হাজৰিকাই প্ৰকাশ কৰা অনুসৰি অসমৰ প্ৰায় 97খন নগৰত হাইমাষ্ট লাইট লগোৱাৰ কাম চলি আছে, ইয়াৰ উদ্বোধনী পলাশবাৰীৰ পৰাই কৰা হ'ব ৷ আগন্তুক দূৰ্গা পূজাৰ পূৰ্বেই ৰাজ্যৰ মুখ্যমন্ত্ৰীয়ে হাইমাষ্ট লাইটৰ কাম উদ্বোধন কৰিব ৷
পৌৰসভা কাৰ্যালয়ত মন্ত্ৰী পীযুষ হাজৰিকা পলাশবাৰী সমষ্টিৰ বিধায়ক প্ৰনৱ কলিতাই পূঁজি ব্যৱহাৰ কৰিব নোৱাৰাটো পৌৰসভাৰ দুৰ্বলতা বুলি উল্লেখ কৰে ৷ আনহাতে পৌৰপতি ৰাতুল শৰ্মাই সাংবাদিকৰ আগত কয় যে, "ফাণ্ড ব্যৱহাৰ হৈছে ৷ বিল দিয়া হ'লেই সকলোখিনি ঠিক হৈ যাব ৷ 13ৰ গোচৰ এটা হাইকোৰ্ট কৰা হৈছে বাবেই ফাণ্ডৰ হিচাপ দিয়াত কিছু দেৰি হৈছে ৷ পূজাৰ আগে আগে প্ৰায় 50 লাখ টকাৰ বিল পৰিশোধ হৈ যাব ৷" মন্ত্ৰী হাজৰিকাই পৌৰসভাৰ কাম-কাজ নিৰীক্ষণ কৰাৰ লগতে হাইমাষ্ট লাইট উদ্বোধন কৰিবলৈ পলাশবাৰীলৈ আহিব বুলি জনায় ৷ সেই বাবেই কামৰ খতিয়ান ল'বলৈ এইদৰে পলাশবাৰীত উপস্থিত হোৱা বুলি কয় মন্ত্ৰী হাজৰিকাই ৷
