চাংসাৰি, 21 ছেপ্তেম্বৰ : কৰ'ণা আক্ৰান্ত ৰোগীৰ বাবে কামৰূপ জিলাৰ ভিন্ন প্ৰান্তত স্থাপন কৰা ক'ভিড চিকিৎসালয় আৰু কোৱাৰান্টাইন কেন্দ্ৰত কামৰূপ জিলা প্ৰশাসনে 6 মাহৰ বাবে ঠিকাভিত্তিক চাফাই কৰ্মী হিচাপে নিযুক্তি প্ৰদান কৰা প্ৰায় 150 গৰাকী চাফাই কৰ্মীৰ ভিতৰত জিলা প্ৰশাসনে 95 গৰাকী চাফাই কৰ্মীক বৰ্খাস্ত কৰাক কেন্দ্ৰ কৰি সোমবাৰে সমগ্ৰ জিলাখনত তীব্ৰ প্ৰতিক্ৰিয়াৰ সৃষ্টি হৈছে ।
উল্লেখ্য যে, কৰ'ণা মহামাৰীয়ে কালৰূপ ধাৰণ কৰাৰ পৰিপ্ৰেক্ষিতত মে' মাহত প্ৰশাসনে বিজ্ঞাপন প্ৰকাশ কৰি সাক্ষাৎকাৰৰ গ্ৰহণ কৰি চাফাই কৰ্মী সকলক 6 মাহৰ বাবে নিযুক্তি প্ৰদান কৰিছিল । সেই মৰ্মে চাফাই কৰ্মী সকলে নিজৰ জীৱনকো তুচ্ছ জ্ঞান কৰি কৰ'ণা আক্ৰান্ত ৰোগী সকলৰ সেৱা কৰাৰ লগতে চাফাই কৰ্মত নিয়োজিত হৈ আছিল । কিন্তু কামৰূপ জিলা প্ৰশাসনে হঠাৎ 95 গৰাকী চাফাই কৰ্মীক কৰ্মৰ পৰা বৰ্খাস্ত কৰাৰ বাৰ্তা প্ৰেৰণ কৰাত চাফাই কৰ্মী সকল ক্ষোভিত হৈ পৰে ।