ৰঙিয়া,১৮ জুন: ৰঙিয়া বিধানসভা সমষ্টিৰ অন্তৰ্গত তুলসীবাৰী-জয়ন্তীপুৰ,গোগমালেচা গাঁৱৰ কাষতে বৈ থকা বৰলীয়া নৈয়ে সংহাৰী ৰূপ ধাৰণ কৰিছে। বাৰিষা প্ৰচুৰ বৃষ্টিপাতৰ পাছতে নৈৰ দুয়োপাৰ খহাই নিয়াত আতংকগ্ৰস্ত ৰাইজে বিনিদ্ৰ ৰজনী কটাবলগীয়া হৈছে। প্ৰায় শতাধিক পৰিয়ালে আশ্ৰয়ৰ বাবে নিৰাপদ স্থানলৈ গতি কৰিছে। পূৰ্বেও খহনীয়াৰ কৱলত পৰা এই অঞ্চলকেইটাত ৰঙিয়া জলসম্পদ বিভাগে কিছু কাম হাতত লৈছিল যদিও একাংশ বিষয়া-কৰ্মচাৰীৰ হেমাহি আৰু দুৰ্নীতিগ্ৰস্ত ঠিকাদাৰৰ নিম্নমানৰ কামৰ বাবে অঞ্চলটো পুনৰ খহনীয়াৰ কৱলত পৰে ।
বৰলীয়া নৈৰ সংহাৰী ৰূপ : আতংকগ্ৰস্ত ৰাইজ বালি আৰু বাঁহেৰে গৰাখহনীয়া ৰোধৰ চেষ্টা কৰি চৰকাৰী ধন শৰাধ কৰাৰো অভিযোগ উত্থাপন হৈছে এই দুৰ্নীতিগ্ৰস্ত কৰ্মচাৰীসকলৰ বিৰুদ্ধে। পুনৰ ৰঙিয়া জলসম্পদ বিভাগে একেজন ঠিকাদাৰৰ হতুৱাই আৰু একে প্ৰক্ৰিয়াৰে গৰাখহনীয়া ৰোধ কৰিবলৈ যোৱাত ৰাইজৰ চকু কপালত উঠিছে । নৈত পানী বাঢ়িলেই আতংকত ভোগা অঞ্চলটোৰ ৰাইজে বিভাগ তথা ঠিকাদাৰক গৰাখহনীয়া ৰোধৰ নামত ধেমালি নকৰিবলৈ সকীয়াই দিছে। ইতিমধ্যে বিশ ঘৰতকৈও অধিক পৰিয়ালে নিজৰ ঘৰ-বাৰী এৰি আশ্ৰয় লৈছে গৈ নিৰাপদ স্থানত। আনহাতে বন বিভাগক নিয়ন্ত্ৰণত ৰাখি একাংশ অসাধু ব্যবসায়ীয়ে নিতৌ বিভিন্ন ঠাইত নৈৰ বুকু খান্দি অবৈধ বালিৰ বেহা চলাই আহিছে ।
