ৰঙিয়াত উপস্থিত ITBPৰ ২১ জনীয়া চাইকেলিষ্টৰ দল

অমৃত মহোৎসৱৰ লগত সংগতি ৰাখি ১৫ আগষ্টত ITBP ৰ ২১ জনীয়া এটা দলে চাইকেল ৰেলীৰে যাত্ৰা আৰম্ভ কৰিছিল । মঙলবাৰে ৰঙিয়াত উপস্থিত হৈ জোৱানসকলৰ দলটোৱে নিজৰ মনৰ ভাৱ ব্যক্ত কৰে ।

ৰঙিয়া, ২৪ আগষ্ট :দেশৰ ৭৫ তম স্বাধীনতা দিৱসৰ (75th Independence Day) লগত সংগতি ৰাখি এইবাৰ অমৃত মহোৎসৱৰ (Amrit Mahotsav) আয়োজন কৰা হৈছিল । এই কাৰ্যসূচীৰ অধীনতে ইণ্ডো-তিব্বেটান সীমান্ত বলে (ITBP) হাতত লৈছিল এক বিশেষ পদক্ষেপ । স্বাধীনতা দিৱসৰ দিনটোতে ইটানগৰৰ ITBPৰ মুখ্য কাৰ্যালয়ৰ পৰা এক চাইকেল ৰেলী (Cycle rally) উলিওৱা হৈছিল ।

ITBPৰ ১০ টা বেটেলিয়ান কোম্পানীয়ে এই ৰেলীত অংশগ্ৰহণ কৰিছিল । সম্প্ৰতি ITBPৰ জোৱানৰ বিশেষ দলটো আহি উপস্থিত হৈছে কামৰূপ জিলাৰ ৰঙিয়াত । ২১ জনীয়া দলটোৱে ৩০ আগষ্টত এই ৰেলী শিলিগুৰিত সমাপ্ত কৰিব । ১৬ দিনৰ ভিতৰত ৮৬২ কিলোমিটাৰ যাত্ৰা সামৰণি পৰাৰ পাছত শিলিগুৰিৰ পৰা আন এটা দলে দিল্লীলৈ যাত্ৰা আৰম্ভ কৰিব ।

আইটিবিপিৰ দলটোৱে ৰঙিয়াত উপস্থিত হৈ নিজৰ অনুভৱ ব্যক্ত কৰাৰ লগতে কয় যে, তেওঁলোকে দেশৰ স্বাধীনতাৰ অমৃত মহোৎসৱৰ লগত সংগতি ৰাখি এই পদক্ষেপ গ্ৰহণ কৰিছে । ইয়াৰ উদ্দেশ্য হৈছে বিভিন্ন ধৰণে ৰাইজক সজাগ কৰা ।

কৰ'ণা (Corona) সম্পৰ্কীয় সজাগতাৰ লগতে ফিট ইণ্ডিয়া (FIT India), স্বচ্ছ ভাৰত (Swachh Bharat) আদি আঁচনি সন্দৰ্ভতো ৰাইজক সজাগ কৰাৰ চেষ্টা কৰা হৈছে । দেশৰ প্ৰায় প্ৰতিখন ৰাজ্যৰে জোৱানসকলে এই ৰেলীত অংশগ্ৰহণ কৰিও ভাতৃত্ববোধৰ আন এক বাৰ্তা প্ৰেৰণ কৰাৰ চেষ্টা কৰা হৈছে বুলি জোৱানসকলে জানিবলৈ দিয়ে ।

লগতে পঢ়ক :সামৰণি পৰিল তিনিদিনীয়া জন আশীৰ্বাদ যাত্ৰাৰ