ধ্বংসৰ গৰাহত ঐতিহাসিক আৰিমত্ত গড়

ইতিহাসৰ এক অবিচ্ছেদ্য অংগ বৈদ্যগড় বা আৰিমত্ত গড় ৷ সেই ইতিহাস প্ৰসিদ্ধ আৰিমত্ত গড় আজি অস্তিত্বৰ সংকটত ৷ যি ঐতিহাসিক সমল ৰক্ষাৰ ক্ষেত্ৰত চৰকাৰে কোনো ধৰণৰ গুৰুত্ব আৰোপ নকৰাৰ অভিযোগ উত্থাপন হৈছে ৷

ৰঙিয়া, 17 ডিচেম্বৰ: ১১৩৮ খৃষ্টাব্দৰ পৰা ১১৮৫ খৃষ্টাব্দলৈ কামৰূপ তথা প্ৰাগজ্যোতিষপুৰত ৰাজত্ব কৰা ৰজা বৈদ্যদেৱে পোনপ্ৰথমে নিৰ্মাণ কৰোৱাইছিল ঐতিহাসিক গড়টো ৷ যাৰ বাবে গড়টো বৈদ্যগড় নামেৰে জনাজাত ৷ একাংশৰ মতে, গড়টো পৰৱৰ্তী সময়ত জিতাৰি বংশৰ ৰজা আৰিমত্তই পুনৰ নিৰ্মাণ কৰোৱাৰ বাবে আৰিমত্ত গড় নামেৰেও জনাজাত ৷

বুৰঞ্জীৰ তথ্য অনুসৰি,গৌড় ৰাজকুমাৰ পাল সেনাপতি বৈদ্যদেৱে কামৰূপৰ পশ্চিম অংশ জয় কৰি কমতাপুৰ নামে সুকীয়া স্বাধীন ৰাজ্য ঘোষণাৰে নিজৰ ৰাজ্য ৰক্ষাৰ বাবে ১১৪২ খ্ৰীষ্টাব্দত বেতনাত ৰাজধানী পাতে ৷ সেই অনুসৰি গড়টো পূৱৰ পৰা পশ্চিমলৈ ছয় মাইল দৈৰ্ঘ আৰু উত্তৰৰ পৰা পৰা দক্ষিণলৈ প্ৰায় চাৰি মাইল প্ৰস্থৰে নিৰ্মাণ কৰে সমসাময়িক ৰজাগৰাকীয়ে৷ পৰৱৰ্তী সময়ত ১৩৬৫ খ্ৰীষ্টাব্দত ৰজা আৰিমত্তই গড়টো পুনৰ নিৰ্মাণ কৰি ৰাজধানী বেতনাৰ পৰা আয়ত আকাৰ গড়ৰ ভিতৰলৈ অৰ্থাৎ বৰ্তমানৰ ৰঙিয়ালৈ স্থানান্তৰ কৰে ৷ 12 খন ৰাজহ গাঁৱেৰে ভৰা গড়টোৰ পৰিসীমাৰ মুঠ মাটিকালিৰ পৰিমাণ ২৮,৯৬০ বিঘা, ৯ কঠা, ১৬ লোচা ৷

ইতিহাস প্ৰসিদ্ধ আৰিমত্ত গড় আজি অস্তিত্বৰ সংকটত

কিন্তু কেইবা শতিকা পুৰণি সেই গড় আজি ধ্বংসৰ গৰাহত ৷ ভাৰত-ভুটান আন্তঃৰাষ্ট্ৰীয় ঘাইপথে কেইবাঠাইতো প্ৰচ্ছেদ কৰা গড়টোৰ পৰা প্ৰায়ে স্থানীয় ৰাইজৰ লগতে অন্য লোকে মাটি কাটি লৈ যায় ৷ লগতে গড়টোত থকা ঔষধি গছ আৰু মূল্যবান গছসমূহো নিশাৰ এন্ধাৰৰ সুযোগ লৈ একাংশই কাটি নিয়াৰ অভিযোগ উত্থাপন হৈছে ৷

গড়টোত থকা ঔষধি গছ আৰু মূল্যবান গছসমূহো নিশাৰ এন্ধাৰৰ সুযোগ লৈ একাংশই কাটি নিয়ে

স্থানীয় ৰাইজৰ অভিযোগ অনুসৰি, গড়টো সংৰক্ষণৰ ক্ষেত্ৰত আজি পৰ্যন্ত কোনো ধৰণৰ গুৰুত্ব আৰোপ কৰা নাই শাসনৰ গাদীত অধিস্থিত লোকসকলে ৷ যদি চৰকাৰে গড়টো সংৰক্ষণৰ ক্ষেত্ৰত উচিত পদক্ষেপ গ্ৰহণ কৰে তেন্তে অনাগত দিনত সেই স্থান পৰ্যটনস্থলী হিচাপে ৰূপান্তৰিত হোৱাৰ বহু থল আছে ৷ যাৰ বাবে প্ৰয়োজন মাথো সজাগতা আৰু নিৰাপত্তাৰ ৷

লগতে পঢ়ক:ধোঁৱা চাঙত মাজুলী সুৰক্ষাৰ 237 কোটি টকীয়া আঁচনি