যৌতুক আনিবলৈ গৈ গুৰুলা-গুৰুলকৈ পিটন খালে আৰক্ষীয়ে

উল্লেখযোগ্য যে আদালতৰ নিৰ্দেশনাৰ ভিত্তিত হাজো আৰক্ষীৰ এটা দলে খাইৰুল হক নামৰ এজন লোকৰ ঘৰত বৃহস্পতিবাৰে নিশা ১ বজাত অভিযান চলাইছিল । অভিযান চলোৱা আৰক্ষীক বেয়াকৈ মাৰ-ধৰ কৰি বৰ্তমান ৰঙাঘৰৰ আলহী হ'বলগীয়া হৈছে উক্ত পৰিয়াটো ৷

হাজো, 18 অক্টোবৰ:যৌতুক উভতাই ল'বলৈ গৈ ঔকিল পৰিল হাজো আৰক্ষীৰ পিঠিত ৷ ঘটনা অনুসৰি, পত্নীয়ে দিয়া এটা গোচৰৰ বাবে হাজোৰ নিবাসী খাইৰুল হকৰ গৃহত উপস্থিত হৈছিল হাজো আৰক্ষী ৷ তাৰ পিচতে ঘটনাস্থলীত সৃষ্টি হয় এক যুদ্ধ সদৃশ পৰিবেশ । ঘটনা সন্দৰ্ভত জানিব পৰা মতে, পত্নীৰ গোচৰৰ ভিত্তিত খাইৰুলৰ ঘৰত থকা যৌতুকৰ সামগ্ৰী নিবলৈ উপস্থিত হোৱা আৰক্ষীক খাইৰুলৰ লগতে তেঁওৰ আত্মীয়ই গুৰুলা গুৰুলকৈ প্ৰহাৰ কৰে । এই সমগ্ৰ ঘটনাত আহত হয় দুগৰাকী মহিলা আৰক্ষীৰ লগতে তিনিজনকৈ আৰক্ষী বিষয়া।

উল্লেখ্য যে, আহত কেইবাজনো আৰক্ষীৰ পোছাক পৰ্যন্ত ফালি দিয়ে খাইৰুল তথা তেঁওৰ আত্মীয়ই। অভিযুক্তৰ আক্ৰমণৰ পৰা সাৰি নগ'ল হাজো থানাৰ উপ পৰিদৰ্শক পুৰবী নৰহ । ইয়াৰ উপৰিও কনিষ্টবল মিতালী দাস আৰু 4th APBN ৰ নায়ক উদয় চন্দ্ৰ ডেকা কিছু পৰিমাণে আঘাটপ্ৰাপ্ত হয় । ইতিমধ্যে ঘটনা সম্পৰ্কত পাঁচজন লোকক গ্ৰেপ্তাৰ কৰিছে ৷ আটকাধীন লোককেইজন আনছাৰ উল্লা তালুকদাৰ, ৰমজান আলী, ধন আলী, মিন্টু হুছেইন আৰু আনোৱাৰ হুছেইন।