উৎকোচ লৈ থাকোতেই গ্ৰেপ্তাৰ বন বিষয়াক

দুৰ্নীতি নিবাৰক শাখাৰ জালত পৰিছে ছয়গাঁৱৰ এগৰাকী বন বিষয়া ৷ উৎকোচ লোৱা অৱস্থাতে গ্ৰেপ্তাৰ ৰেঞ্জাৰ লক্ষেশ্বৰ দাস ৷

বকো, 24 ডিচেম্বৰ :ছয়গাঁৱত উৎকোচ লৈ গ্ৰেপ্তাৰ হৈছে এগৰাকী বন বিষয়া ৷ বামুণীগাঁও বন সুৰক্ষা বাহিনীৰ ৰেঞ্জাৰ লক্ষেশ্বৰ দাসক গ্ৰেপ্তাৰ কৰিছে দুৰ্নীতি নিবাৰক শাখাই ৷ উৎকোচ লৈ থকাৰ সময়ত হাতে-লোটে ধৰা পৰে বন বিষয়াগৰাকী ৷

প্ৰাপ্ত তথ্য অনুসৰি, বন বিভাগে জব্দ কৰা বালি ভৰ্তি ডাম্পাৰ মুকলি কৰি দিয়াৰ বাবদ উৎকোচ বিচাৰিছিল বিষয়া গৰাকীয়ে ৷ 60 হাজাৰ টকা বিচাৰিছিল ডাম্পাৰৰ গৰাকীক ৷ এই সন্দৰ্ভত দুৰ্নীতি নিবাৰক শাখাক অৱগত কৰা হৈছিল ৷ চাহাবুল ইছলাম নামৰ ব্যক্তিগৰাকীয়ে বন বিষয়া লক্ষেশ্বৰ দাসক ধন উৎকোচ দিয়াৰ সময়তে দুৰ্নীতি নিবাৰক শাখাৰ দল উপস্থিত হৈ হাতে-লোটে ধৰা পেলাই বিষয়া গৰাকীক ৷

গ্ৰেপ্তাৰ হোৱা বিষয়া গৰাকীয়ে কেমেৰাৰ সন্মুখত বিভিন্ন অজুহাত দেখুৱাই নিজৰ নিৰ্দোষিতা প্ৰমাণ কৰিব খুজিছে যদিও, তেওঁ প্ৰকৃততে দোষী হয় নে নহয় সেয়া তদন্তৰ অন্ততহে নিশ্চিত হ’ব ৷ ইপিনে বিষয়াগৰাকীক হাতে-লোটে ধৰাৰ আনন্দত স্থানীয় ৰাইজে অসম আৰক্ষীৰ দুৰ্নীতি নিবাৰক শাখা জিন্দাবাদ ধ্বনি দি আতচবাজী ফুটাই উল্লাস কৰা পৰিলক্ষিত হৈছে ৷

লগতে পঢ়ক :চাকৰিৰ প্ৰলোভনেৰে ধন সংগ্ৰহ কৰা প্ৰৱঞ্চকক কৰায়ত্ব