ৰঙিয়া,13 জুলাইঃ প্ৰলয়ংকাৰী বানত ডুব গৈছে ৰঙিয়া মহকুমা । বগৰীবাৰীত মথাউৰি চিঙি পুঠিমাৰী নৈৰ বানে সংহাৰী ৰূপ ধাৰণ কৰিছে । কেইবা সহস্ৰাধিক পৰিয়ালৰ ঘৰ-দুৱাৰ নিঃশেষ হৈ গৈছে নদীৰ প্ৰৱল সোঁতত । বানত ককবকাই আছে ৰঙিয়া মহকুমাৰ লগতে বাক্সাৰ শতাধিক গাঁৱৰ গঞাই । ইফালে গড়কাপ্তানী পথৰ ওপৰতো এবুকু পানী । ইতিমধ্যে ৰঙিয়া নগৰৰ কেইটামান মূল পথত যাতায়ত বন্ধ কৰি দিছে প্ৰশাসনে ।
সম্প্ৰতি ওখ স্থান বিচাৰি হাহাকাৰ কৰিছে বানাক্ৰান্ত ৰাইজে । চৰকাৰী কাৰ্যালয়, চিকিৎসালয় ভৰি পৰিছে এককাল পানীৰে । SDRF বাহিনী, NDRF বাহিনী, স্থানীয় বিধায়ক তথা মন্ত্ৰী ভৱেশ কলিতা, মহকুমাধিপতি বেদাংগ তালুকদাৰ, BJP, AGP, CONG, AASU, ABMSU ৰ কৰ্মীসকলেও নিজাববীয়াকৈ উদ্ধাৰ অভিযান অব্যাহত ৰাখিছে । বৰ্তমানেও শ শ পৰিয়াল আবদ্ধ হৈ আছে বানৰ মাজতে ৷ উপায়ন্তৰ হৈ কোনোৱে যদি আশ্ৰয় লৈছে মথাউৰিত, কোনোৱে আকৌ আশ্ৰয় লৈছে ৰে'ল লাইনৰ ওপৰত ৷ বানৰ মাজতে খাদ্যৰ অভাৱেও জুৰুলা কৰিছে বানাক্ৰান্ত লোকসকলক ৷