বৰলীয়াৰ কালৰূপত ত্ৰাসিত নৈ পৰীয়া

দিনক দিনে কাল ৰূপ ধাৰণ কৰিছে বৰলীয়া নৈৰ খহনীয়াই ৷ ইতিমধ্যে 25 টাত কৈ অধিক পৰিয়াল গৰাখহনীয়াৰ কৱলত পৰি গৃহহীন হ'বলগীয়া হৈছে ৷ কিন্তু গুৰুত্ব নাই জনপ্ৰতিনিধিৰ ৷

ৰঙিয়া, 6 জুলাই : বাৰিষাৰ এই সময়ছোৱাত অস্থায়ীভাৱে হ'লেও খৰাখহনীয়া ৰোধ কৰিবৰ বাবে বিশেষ তৎপৰতা প্ৰদৰ্শন কৰিছিল ৰাজ্যৰ চৰকাৰৰ জলসম্পদ বিভাগে ৷ কিন্তু এই তৎপৰতাৰ মাজতে ৰঙিয়াৰ হাচানটুকত বৰলীয়া নৈৰ ভয়াবহ গৰাখহনীয়াই বহু কেইটা পৰিয়ালৰ বাবে এতিয়া বিপদ মাতিছে ৷

জানিব পৰা মতে ৰঙিয়া হাচানটুকত বৰলীয়া নৈৰ ভয়াৱহ গৰাখহনীয়াৰ বাবে ২৫ টা পৰিয়ালৰ গৃহ ইতিমধ্যে জাহ গৈছে নৈৰ বুকুত । এতিয়াও অব্যাহত আছে বৰলীয়া নৈৰ ভয়াৱহ গৰাখহনীয়া ৷ দিনক দিনে গৰাখহনীয়াই ভয়ংকৰ ৰূপ ধাৰণ কৰাত এতিয়া আতংকিত হৈ পৰিছে ৰঙিয়াৰ হাচানটুকৰ নৈ পৰীয়া ৰাইজ ৷

ৰাইজৰ অভিযোগ অনুসৰি, বৰলীয়া নৈৰ গৰাখহনীয়া ৰোধ কৰাৰ ক্ষেত্ৰত বহুবাৰ বিভাগীয় কৰ্তৃপক্ষক অৱগত কৰা হৈছিল ৷ কিন্তু বিভাগীয় কৰ্তৃপক্ষই খহনীয়া ৰোধ কৰা ক্ষেত্ৰত প্ৰতিশ্ৰুতি প্ৰদান কৰিও আজিকোপতি কোনো ব্যৱস্থা গ্ৰহণ নকৰিলে ৷ খহনীয়া ৰোধৰ বাবে চৰকাৰ-প্ৰশাসন তথা জলসম্পদ বিভাগে পদক্ষেপ গ্ৰহণ নকৰাৰ বাবে এতিয়া ভয়ংকৰ ৰূপ লৈছে বৰলীয়া লৈৰ খহনীয়াই ৷

উল্লখ্য যে, বৰলীয়া নৈৰ খহনীয়া এই বছৰে প্ৰথম নহয় ৷ প্ৰত্যেক বছৰে বৰলীয়া লৈৰ খহনীয়াই বাৰিষাৰ কালত প্ৰৱল ৰূপ ধাৰণ কৰে ৷ এই খহনীয়াত শতাধিক লোকৰ ঘৰ-সম্পত্তি নদীৰ বুকুত জাহ গৈছে ৷ বহু লোক গৃহহীন হৈছে আৰু অন্য স্থানলৈ স্থানান্তৰিত হৈছে ৷

ইফালে, স্থানীয় বিধায় গৰাকী এই ক্ষেত্ৰত অৱগত হয় যদিও বৰ্তমানেও ৰঙিয়া হাচানটুকত বৰলীয়া নৈৰ ভয়াৱহ গৰাখহনীয়া পৰিদৰ্শন কৰিবলৈ যোৱা নাই ৷ তদুপৰি জনপ্ৰতিনিধি হিচাপে বিধায়ক গৰাকীয়ে খহনীয়াগস্থ লোকৰ খবৰ ল'বলৈ আহৰি পোৱা নাই ৷ এনে পৰিপেক্ষিতত বৰলীয়া নৈৰ খহনীয়া ৰোধ কৰিবৰ বাবে বিভাগীয় কৰ্তৃপক্ষক পুনৰ বাৰ দাবী জনাইছে ৰঙিয়াৰ হাচানটুকৰ নৈপৰীয়া ৰাইজে ৷

লগতে পঢ়ক: ভুৱা হিতাধিকাৰী বিচাৰি বিধায়কৰ ক্ষেত্ৰ ভিত্তিক অনুসন্ধান