বানপানীৰ সুযোগ লৈ চন্দ্রপুৰত সক্ৰিয় হৈছে গৰু চোৰৰ চক্ৰ

অবৈধ গৰু সৰৱৰাহৰ তথা ব্যৱসায় ৰোধ কৰাৰ বাবে চৰকাৰে কঠোৰৰ পৰা কঠোৰ পদক্ষেপ গ্ৰহণ কৰি থকাৰ মাজতে ৰাজ্যত বৰ্তমানেও সক্ৰিয় হৈছে গৰু চোৰৰ চক্ৰ ৷ ৰাজ্যৰ বিভিন্ন স্থানত সন্ত্ৰাস সৃষ্টি কৰিছে এই চক্ৰটোৱে ৷

গুৱাহাটী,3 ছেপ্টেম্বৰ: চৰকাৰে গো-সুৰক্ষাৰ বাবে কঠোৰ আইন প্ৰণয়ন কৰিছে ঠিকেই; কিন্তু ৰাজ্যত অব্যাহত থকা গৰু চুৰি চক্ৰৰ দৌৰাত্ম ৰোধ কৰিবলৈ সক্ষম হোৱা নাই আৰক্ষী-প্ৰশাসন ৷ ভদিয়া বানে ৰাজ্যৰ ভিন্ন প্ৰান্তত কালৰূপ ধাৰণ কৰি চহা তথা কৃষিজীৱী লোকৰ জীৱন-জীৱিকাৰ ওপৰত বাৰুকৈয়ে প্ৰভাৱ পেলোৱাৰ সময়তে এতিয়া বানপানীৰ সুযোগ লৈ ৰাজ্যত পুনৰ সক্ৰিয় হৈ পৰিছে গৰু চুৰি চক্ৰ ৷ গৰু চুৰি চক্ৰৰ কৱলত পৰিছে নিমিষতে থানবান হৈ পৰিছে কৃষিজীৱী পৰিয়ালৰ সপোন তথা ভৱিষ্যত ৷

বৃহস্পতিবাৰে নিশা তেনে এক ঘটনা সংঘটিত হৈছে মহানগৰীৰ প্ৰাগজ্যোতিষপুৰ আৰক্ষী থানাৰ অন্তৰ্গত চন্দ্ৰপুৰ বাগিছা গাঁৱত ৷ এটি পৰিয়ালৰ 7 জনী গাই আৰু 3 টা দমৰা গৰুৰ লগতে আন এটি পৰিয়ালৰ এজনী গাই গৰু সহ মুঠ 11 টা গৰু গোহালিৰ পৰাই চোৰে লৈ যায় ৷ ভুক্তভোগী গো-পালকৰ পৰা জানিব পৰা মতে, বৃহস্পতিবাৰে নিশা প্ৰায় ডেৰ মান বজাত হঠাৎ গৰুৰ হেম্বেলনীৰ শব্দ শুনি গৃহস্থই সাৰ পাই আৰু খালী গোহালি প্ৰত্যক্ষ কৰে ৷

লগে লগে গৃহস্থই বিচাৰ খোচাৰ কৰাত চন্দ্ৰপুৰৰ কলং সুঁতিৰ পাৰৰ সুঁতিৰ গঢ়াত গৰু নমোৱা চিন প্ৰত্যক্ষ কৰে ৷ এই দৃশ্য চাই পৰিয়াল কেইটাই অনুমান কৰে যে, কোনো যন্ত্ৰচালিত নাৱেৰে গৰু চুৰি চক্ৰই গৰু কেইটা কলং সুঁতি হৈ ব্ৰহ্মপুত্ৰৰ বুকুৰে লৈ গৈছে ৷

ইয়াৰ পিছতেই স্থানীয় একাংশ লোকে ব্ৰহ্মপুত্ৰত এখন যন্ত্ৰচালিত নাও প্ৰত্যক্ষ কৰে যদিও তেওঁলোকৰ নাও নোহোৱা হেতু উক্ত নাও খন ধৰিবলৈ সক্ষম নহল ৷ ঘটনা সন্দৰ্ভত স্থানীয় ৰাইজে ওচৰতে থকা ব্ৰহ্মপুত্ৰৰ চাপৰিৰ লোকক খবৰ দিয়াত চাপৰিৰ লোকে নাও লৈ বিচাৰি যায় যদিও বাঢ়নী পানীৰ সোঁতত প্ৰত্যক্ষ কৰা যন্ত্ৰচালিত নাওঁখন বহু দূৰলৈ ভটিয়াই যায় ৷

অৱশ্যে এই ঘটনা সন্দৰ্ভত ভুক্তভোগী গো-পালকসকলে শুকুৰবাৰে পুৱাৰ ভাগত প্ৰাগজ্যোতিষপুৰ আৰক্ষী থানাক অৱগত কৰে যদিও বাতৰি লিখাৰ পৰলৈ চুৰি গো-ধনৰ কোনো সন্ধান লাভ কৰিবলৈ সক্ষম হোৱা নাই ৷ ঘটনাৰ উচিত তদন্তৰ দাবী জনাইছে ভুক্তভোগী পৰিয়ালে ৷

লগতে পঢ়কঃবিপদসংকুলভাৱে নাৱেৰে কৰ্তব্য পালন বনকৰ্মীৰ