ব্ৰহ্মপুত্ৰত উদ্ধাৰ পলাশবাৰীৰ অপহৃত শিশুৰ মৃতদেহ

অৱশেষত পলাশবাৰীৰ পাৰ্লী সদিলাপুৰৰ পৰা অপহৃত শিশুৰ মৃতদেহ উদ্ধাৰ ৷ বৃহস্পতিবাৰে লুইতৰ বুকুত উদ্ধাৰ হয় শিশুটিৰ মৃতদেহ ৷

ছয়গাঁও, 22 জুলাই : অৱশেষত উদ্ধাৰ হ’ল পলাশবাৰীৰ পাৰ্লী সদিলাপুৰৰ অপহৃত শিশুটি ৷ জীৱিত অৱস্থাত নহয়, মৃত অৱস্থাত উদ্ধাৰ হ’ল পাৰ্লী সদিলাপুৰৰ অপহৃত শিশুটি ৷ বৃহস্পতিবাৰে মহাবাহু ব্ৰহ্মপুত্ৰৰ বুকুত উদ্ধাৰ হয় শিশুটিৰ মৃতদেহ ৷

প্ৰাপ্ত তথ্য অনুসৰি, সোমবাৰে দুপৰীয়াৰ পৰাই নিখোজ হৈ আছিল শিশুটি ৷ পৰিয়াল তথা চুবুৰীয়াই পদুলিমুখৰ পৰাই চাৰিচকীয়া বাহনত শিশুটিক দুৰ্বৃত্তই লৈ যোৱাৰ সন্দেহ প্ৰকাশ কৰিছিল । হৰি কলিতা আৰু জুনু কলিতাৰ ছয় বছৰীয়া পুত্ৰ আছিল কৌশিক কলিতা নামৰ শিশুটো ৷

এই ঘটনাৰ সন্দৰ্ভত পৰিয়ালৰ লোকে পলাশবাৰী নগৰ আৰক্ষী চকীত এখন এজাহাৰ দাখিল কৰিছিল । কিন্তু শিশুটিৰ কোনো শুংসূত্ৰ লাভ কৰিবলৈ সক্ষম হোৱা নাছিল আৰক্ষী ৷ দৰাচলতে ভালদৰে কথা ক’বলৈ নোৱাৰা কৌশিকৰ সন্ধান উলিওৱাত ব্যৰ্থ হৈছিল স্থানীয় আৰক্ষী ৷

অৱশেষত শিশুটিৰ মৃতদেহ উদ্ধাৰ হয় লুইতৰ বুকুত ৷ আৰক্ষীৰ উচ্চপদস্থ বিষয়াৰ এটি দল ঘটনাস্থলীত উপস্থিত হৈ চলাই আছিল তদন্ত ৷ অৱশেষত বৃহস্পতিবাৰে দুপৰীয়া ঘৰৰ ওচৰতে মহাবাহু ব্ৰহ্মপুত্ৰৰ বুকুত উপঙি থকা অৱস্থাত শিশুটিৰ মৃতদেহ উদ্ধাৰ হয় । কোনো লোকে হত্যা কৰি পেলাই দিয়া বুলি পৰিয়ালৰ লোকে সন্দেহ প্ৰকাশ কৰিছে ৷

আৰক্ষীৰ তদন্ততহে ওলাব শিশুটিৰ মৃত্যুৰ প্ৰকৃত ৰহস্য । এই ঘটনাক লৈ অঞ্চলটোত বিৰাজ কৰিছে চাঞ্চল্যই ৷ স্থানীয় ৰাইজে ঘটনাৰ লগত জড়িত দোষীৰ উচিত শাস্তি প্ৰদানৰ দাবী উত্থাপন কৰিছে ৷

লগতে পঢ়ক:মুলসূঁতিলৈ ঘূৰি আহিল বাথা