ছয়গাঁও ১ আগষ্ট : কামৰূপ জিলাৰ ছয়গাঁৱত কলহী নৈয়ে বিভিন্ন ঠাইত ভয়াৱহ গৰাখহনীয়াৰ সৃষ্টি কৰাৰ বাতৰি বিভিন্ন সংবাদ মাধ্যমত প্ৰকাশ হৈ আহিছে৷ বৃহস্পতিবাৰে বিয়লি অসম চৰকাৰৰ জলসম্পদ মন্ত্ৰী কেশৱ মহন্তই কলহী নৈৰ গৰাখহনীয়া পৰিদৰ্শন কৰিবলৈ ছয়গাঁৱত উপস্থিত হয় । ছয়গাঁৱত উপস্থিত হৈ মন্ত্ৰী গৰাকীয়ে অসম চৰকাৰৰ খাদী আৰু গ্ৰামোদ্যোগ বিভাগৰ অধ্যক্ষ তথা প্ৰাক্তন মন্ত্ৰী ডাঃ কমলা কলিতাৰ লগত ছয়গাঁৱৰ পটৰীখাট, মাকেলী, নতুন কটহী আৰু ছয়গাঁৱৰ গৰাখহনীয়া পৰিদৰ্শন কৰে ।
উক্ত গৰাখহনীয়া ঠাইসমূহ পৰিদৰ্শন কৰি ছয়গাঁৱৰ পৰিদৰ্শন বাংলালৈ যায় মন্ত্ৰীগৰাকী । সাংবাদিকে সোধা প্ৰশ্নৰ উত্তৰত মন্ত্ৰীগৰাকীয়ে কয় যে, এইবাৰ বিধানসভাত বান গৰাখহনীয়াৰ ওপৰত বহু দীঘলীয়া সময় আলোচনা হৈছে আৰু বিত্ত বিভাগে এই ক্ষেত্ৰত প্ৰথম বাৰৰ বাবে এক দাবী মঞ্জুৰি লয় । লগতে বান গৰাখহনীয়াৰ বাবে এটা "একচন প্লেন" হাতত লোৱা বুলিও উল্লেখ কৰে মন্ত্ৰীগৰাকীয়ে । মন্ত্ৰী গৰাকীক জল সম্পদ বিভাগৰ বিভাগীয় বিষয়া, কাৰ্যবাহী অভিযন্ত্ৰা, ছয়গাঁও ৰাজহ চক্ৰৰ চক্ৰ বিষয়া ডঃ প্ৰীতিলেখা ডেকা, ছয়গাঁও ৰাজহ চক্ৰৰ সংলগ্ন চক্ৰ বিষয়া অংকিতা শৰ্মা, ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া ৰপম হাজৰিকাৰ লগতে স্থানীয় কেইবাজনো বিশিষ্ট লোকে সংগ দিয়ে ৷
