ছয়গাঁও,27 মেঃ ছয়গাঁৱৰ কলহী নৈত তীব্ৰ গৰাখহনীয়া । নৈৰ বুকুত জাহ গ’ল ছয়গাঁৱৰ পৰা বালাসিদ্ধিলৈ যোৱা পথ ৷ আনহাতে নৈখনৰ পাৰেদি ছয়গাঁও ঘাইপথৰ শিৱমন্দিৰৰ পৰা শিংখাটলৈ যোৱা ব্লক ফেভাৰৰ পথটোৰো 50 মিটাৰ অংশ নৈৰ বুকুত জাহ যায় ৷ উল্লেখ্য যে, ২০১৭ চনত প্ৰায় ৪৯ লাখ টকা ব্যয় সাপেক্ষে পথটোৰ নৈপৰীয়া প্ৰায় 200 মিটাৰ অংশত বন্ধ নিৰ্মান কৰা হৈছিল । কিন্তু পঞ্চায়তৰ দ্বাৰা নিৰ্মানত দুৰ্নীতি সংঘটিত হোৱাৰ ফলত অৰ্ধনিৰ্মিত হৈ ৰ'ল বান্ধৰ কাম ।
ছয়গাঁৱৰ কলহী নৈত গৰাখহনীয়া আনহাতে বালাসিদ্ধি গোঁসাইপাৰা গাঁৱৰ কেইবাঠাইতো ২০১৮ চনৰ পৰা কলহী নৈয়ে গৰাখহনীয়া চলাই আছে যদিও উক্ত অঞ্চলত গৰাখহনীয়া ৰোধৰ ব্যৱস্থা গ্ৰহণ কৰা নাই জলসম্পদ বিভাগে । যাৰ ফলত এতিয়া যাতায়াতৰ একমাত্ৰ পথটো নৈৰ বুকুত জাঁহ যোৱাত অৱশেষত ভয় শংকাত দিন কটোৱা অঞ্চলটোৰ ৰাইজে বুধবাৰে নিজে গৰাখহনীয়া ৰোধৰ বাবে হাতে কামে লাগি পৰে ৷ গাঁওখনৰ ৰাইজে ঘৰে ঘৰে বাঁহ তুলি সকলোৱে শ্ৰমদানেৰে বাঁহ পুতি গৰাখহনীয়া ৰোধৰ চেষ্টা চলায় ।
লগতে পঢ়ক-সুখবৰ! ৰাজ্যত অচিৰেই বৃদ্ধি পাব কৰ্ম সংস্থাপন
