বাইহাটা চাৰিআলি, 10 ছেপ্তেম্বৰঃ বিগত 25 আগষ্টত বাইহাটা চাৰিআলি আৰক্ষী চকীৰ অন্তৰ্গত মান্দাকাটা বাগানত সংঘটিত হৈছিল নৃশংস কাণ্ড ৷ বাগানলৈ বুলি ফুৰিবলৈ যোৱা এহাল যুৱক-যুৱতীক শাৰিৰীকভাৱে অপদস্থ কৰাৰ লগতে ৰাজপথৰ ওপৰতে মাৰধৰ কৰিছিল কেইজনমান উন্মাদ লোকে ৷ অৱশেষত আৰক্ষীয়ে গ্ৰেপ্তাৰ কৰিবলৈ সক্ষম হয় উক্ত কাণ্ডৰ সৈতে জড়িত থকা মুল অভিযুক্তক ৷
বাইহাটা আৰক্ষীয়ে গ্ৰেপ্তাৰ কৰিছে ঘটনাৰ লগত জড়িত থকা মুল অভিযুক্ত ইফটিকাৰ হুছেইনক ৷ এই ইফটিকাৰ হুছেইনৰ নেতৃত্বতে সংঘটিত হৈছিল মান্দাকাটা কাণ্ড ৷ যুৱক-যুৱতীহালক পাশৱিক অত্যাচাৰ চলোৱাৰ লগতে ৰাজপথৰ ওপৰতে যুৱতীগৰাকীৰ গাৰ কাপোৰ ফালি দিছিল এইগৰাকী ইফটিকাৰ হুছেইনে ৷
অৱশেষত বাইহাটা আৰক্ষীয়ে বিগত নিশা চাংসাৰি থানাৰ অন্তৰ্গত জলাহ ভাঙুৰি চুবাৰ পৰা গ্ৰেপ্তাৰ কৰে ইফটিকাৰ হুছেইনক ৷ নিৰ্লজ ইফটিকাৰ হুছেইনে ঘটনা সন্দৰ্ভত প্ৰথমে মিছা মাতে যদিও পৰৱৰ্তী সময়ত কেমেৰাৰ সন্মুখতে ঘটনাৰ সত্যতা স্বীকাৰ কৰে ৷ ইতিমধ্যে বাইহাটা আৰক্ষীয়ে ভুক্তভোগীৰ গোচৰৰ ভিত্তিত ইফটিকাৰক আটক কৰি গোচৰ ৰুজু কৰিছে ৷ আনহাতে ঘটনাৰ লগত জড়িত থকা অন্যান্যসকলৰ সন্ধান অব্যাহত ৰাখিছে বাইহাটা চাৰিআলি আৰক্ষীয়ে ৷