ৰঙিয়া, 30 ছেপ্টেম্বৰঃ ৰঙিয়া উচ্চতৰ মাধ্যমিক বিদ্যালয়ৰ খেলপথাৰত চলি থকা হৰদত্ত-বীৰদত্ত ট্ৰফী আমন্ত্ৰণ মূলক দিবা-নৈশ প্ৰাইজমানি ফুটবল প্ৰতিযোগিতাৰ দেওবাৰে অন্ত পৰে ৷ দেওবাৰে অনুষ্ঠিত চূড়ান্ত ফাইনেল খেলত শ্বিলং এআৰচিয়ে 3-0 গ'লৰ ব্যৱধানত অসম পুলিচক হৰুৱাই চূড়ান্ত বিজয়ীৰ সন্মান লাভ কৰে ৷
জলসিঞ্চন মন্ত্ৰী ভৱেশ কলিতাই চূড়ান্ত বিজয়ী শ্বিলং এআৰচি দলক প্ৰাইজমানি সহ ট্ৰফী প্ৰদান কৰে ৷ বিজিত দল অসম পুলিচকো প্ৰাইজমানি সহ ট্ৰফী প্ৰদান কৰে কলিতাই ৷ উল্লেখ্য যে অসম পৰ্য্যটন নিগমৰ অধ্যক্ষ জয়ন্তমল্ল বৰুৱাই উদ্বোধন কৰা খেলৰ প্ৰথম অৰ্ধত শ্বিলঙে 1-0 গ'লত অগ্ৰগতি লাভ কৰে ৷ কেইবা সহস্ৰাধিক লোকৰ উপস্থিতত ফ্লাড লাইটৰ পোহৰত তীব্ৰ উত্তেজনা পূৰ্ণ খেলৰ দ্বিতীয় অৰ্ধত শ্বিলঙে অসম পুলিচক পুনৰ 2 গ'ল দিবলৈ সক্ষম হয় ৷ অসম পুলিচ ব্লুজে কেইবাটাও সুযোগ পাইছিল যদিও কাৰ্যকৰী কৰাৰ ক্ষেত্ৰত ব্যৰ্থ হয় ৷ উল্লেখ্য যে উক্ত খেল খনত প্ৰাক্তন সাংসদ ৰমেন ডেকা , বৰক্ষেত্ৰীৰ বিধায়ক নাৰায়ণ ডেকাৰ লগতে বহু বিশিষ্ট লোক উপস্থিত থাকে৷ ইপিনে মণিপুৰ ,শ্বিলঙৰ লগতে ৰাজ্যৰ 10 টা ফুটবল দলে অংশগ্ৰহণ কৰা প্ৰতিযোগিতাখন অনুষ্ঠিত কৰাত ক্ৰীড়ানুৰাগী ৰাইজৰ সহায় সহযোগিতাৰ শলাগ লয় জলসিঞ্চন মন্ত্ৰী ভৱেশ কলিতাই ।