খোজকাঢ়ি লাডাখলৈ যাত্ৰা অঞ্জলীৰ

চকুত অযুত সপোন, বুকুত অদম্য সাহস, মনত প্ৰবল আত্মবিশ্বাসেৰে অঞ্জলী দাসে লাডাখলৈ খোজকাঢ়ি আৰম্ভ কৰিছে যাত্ৰা ৷ অঞ্জলীয়ে চলিত বৰ্ষত "MTS STEEPLE CHASE" শীর্ষক প্ৰতিযোগিতাত ৰাষ্ট্ৰীয় পৰ্যায়ত স্বৰ্ণপদক অৰ্জন কৰি ৰাজ্যলৈ গৌৰৱ কঢ়িয়াই আনিছিল । তেওঁ মাৰাথান, কাবাডী, চাইক্লিঙতো ৰাজ্যখনক প্ৰতিনিধিত্ব কৰি গৌৰৱ কঢ়িয়াই আনিবলৈ সক্ষম হৈছে ৷

ছয়গাঁও, 16 আগষ্ট : মিৰ্জাৰ বৰিহাটৰ পৰা লাডাখলৈ শুকুৰবাৰে খোজকাঢ়ি যাত্ৰা আৰম্ভ কৰে ৰাষ্ট্ৰীয় খেলুৱৈ অঞ্জলী দাসে ৷ প্ৰায় ২,৮০০ কিল’মিটাৰ দূৰত্বত অৱস্থিত ভাৰত-চীন সীমান্তৱৰ্তী লাডাখলৈ খোজকাঢ়ি যাত্ৰা আৰম্ভ কৰা অঞ্জলী হৈছে অসম তথা উত্তৰ-পূৱৰ প্ৰথমগৰাকী মহিলা । ছয়গাঁও আঞ্চলিক ছাত্ৰ সন্থাই শুভেচ্ছা জনাই কামৰূপ জিলাৰ হাটখোৱাপাৰা নিবাসী তথা ৰাষ্ট্ৰীয় খেলুৱৈ অঞ্জলীক ৷

কামৰূপ(গ্ৰাম্য) জিলাৰ পলাশবাৰী সমষ্টিৰ মিৰ্জাৰ সমীপৰ বৰিহাটৰ হাটখোৱাপাৰা নিবাসী তথা ৰাষ্ট্ৰীয় খেলুৱৈ অঞ্জলী দাসে একক প্ৰচেষ্টাৰে নিজ গৃহৰ পৰা লাডাখলৈ খোজকাঢ়ি যাবলৈ পৰিকল্পনা কৰি শুকুৰবাৰে পুৱা যাত্ৰা আৰম্ভ কৰে । ২০২০ চনত ২০০০ মিটাৰ দৌৰত পুৰস্কাৰ লভা অঞ্জলীয়ে চলিত বৰ্ষত "MTS STEEPLE CHASE" শীর্ষক প্ৰতিযোগিতাত ৰাষ্ট্ৰীয় পৰ্যায়ত স্বৰ্ণপদক অৰ্জন কৰিছিল ।

অঞ্জলী দাসে মাৰাথান, কাবাডী, চাইক্লিঙকে ধৰি বিভিন্ন খেলত ৰাজ্যিক তথা ৰাষ্ট্ৰীয় পৰ্যায়ত অংশগ্ৰহণ কৰি পুৰস্কাৰ লাভ কৰি সুনাম অর্জন কৰিছে । লাডাখলৈ বুলি বৰিহাটৰ নিজ গৃহৰ পৰা যাত্ৰা আৰম্ভ কৰা অঞ্জলীক যাত্ৰা আৰম্ভ কৰাৰ পূৰ্বে ছয়গাঁও আঞ্চলিক ছাত্ৰ সন্থাৰ তৰফৰ পৰা ফুলাম গামোচাৰে শুভেচ্ছা জ্ঞাপন কৰে ।

লগতে পঢ়ক :হিমন্ত বিশ্ব শৰ্মাক দ্বিতীয় নাথুৰাম গড্ছে আখ্যা অখিল গগৈৰ