কামৰূপ, 28 নৱেম্বৰঃ নাগৰিকত্ব সংশোধনী বিধেয়কৰ বিৰুদ্ধে পুনৰ সৰৱ হৈ উঠিল সদৌ অসম ছাত্ৰ সন্থাৰ উপদেষ্টা সমুজ্জ্বল কুমাৰ ভট্টাচাৰ্যৰ লগতে Northeast Student Organisation চমুকৈ NESOৰ অধ্যক্ষ চেমুৱেল জেওৰা । বৃহস্পতিবাৰে দিল্লীৰ পৰা উভতি আহি বৰঝাৰ বিমানবন্দৰত উপস্থিত হোৱা সময়তে NESOৰ অধ্যক্ষ চেমূৱেল জেওৰা আৰু আছুৰ উপদেষ্টা সমুজ্জ্বল কুমাৰ ভট্টাচাৰ্যই CAB আৰু মৌলবাদীৰ বিৰুদ্ধে সৰৱ হৈ পৰে ।
আনহাতে, দিল্লীত NDAৰ সহযোগী ৰাজনৈতিক দল, বিৰোধী ৰাজনৈতিক দলৰ লগতে বিভিন্ন পক্ষক কেবৰ বিৰুদ্ধে থিয় দিবলৈ আহ্বান জনোৱা বুলি মন্তব্য কৰে ভট্টাচাৰ্যই । লগতে অসমৰ পৰা মৌলবাদীক শিপাই পোখালিয়ে উভালি পেলাবলৈ অসম চৰকাৰক আহ্বান জনায় । অসম চুক্তি কাৰ্যকৰী নকৰাৰ বাবে সীমান্ত মুক্ত হৈ আছে যাৰ ফলত অসম-বাংলাদেশ সীমান্তৰে অবৈধ বাংলাদেশী প্ৰৱেশ কৰাৰ লগতে বহুতো মৌলবাদীও প্ৰৱেশ কৰি আহিছে অসমলৈ । লগতে এই নাগৰিকত্ব সংশোধনী বিধেয়ক কেৱল অসম তথা উত্তৰ-পূৰ্বাঞ্চলৰ কাৰণে বিপদজনক নহয় এয়া সমগ্ৰ দেশৰ বাবে সংকটজনক বুলি মন্তব্য কৰে আছুৰ উপদেষ্টা সমুজ্জ্বল কুমাৰ ভট্টাচাৰ্যই ।