গুৱাহাটী, ১৯ নৱেম্বৰ: দীঘলীয়া হৈ পৰিছে ২০২৪ বৰ্ষত মুক্তি পাবলগীয়া অসমীয়া ছবিৰ তালিকাখন । ২০২৪ বৰ্ষত মুক্তিৰ বাবে সাজু হৈছে বহু কেইখন অসমীয়া ছবি । প্ৰস্তুতি ইতিমধ্যে তুংগত উঠিছে । তাৰেই মাজত আহিবলগীয়া অন্যতম এখন প্ৰত্যাশিত ছবি হৈছে "চিকাৰ"।
চিকাৰ ছবিখনৰ শ্বুটিঙত ইতিমধ্যে ব্যস্ত হৈ পৰিছে জুবিন গাৰ্গকে ধৰি কলা-কুশলীসকল । বৰ্তমান লণ্ডনত চলি আছে ছবিখনৰ শ্বুটিঙৰ কাম । অসমত শ্বুটিং সম্পন্ন হোৱা ছবিখনৰ ৭০ শতাংশ শ্বুটিং হ’বলগীয়া আছিল লণ্ডনত । কিছুদিন পূৰ্বে অসমৰ ডিব্ৰুগড় মৰাণৰ খোৱাং চাহ বাগিচাত দৃশ্যগ্ৰহণ হৈছিল "চিকাৰ" ছবিখনৰ ৷ ৰোমাঞ্চ, একচন, থ্ৰীলাৰ ভৰ্তি ছবিখনৰ কাহিনী চাহ বাগিচাৰ এজন যুৱকৰ আধাৰত নিৰ্মিত ।
ইফালে অসমত শ্বুটিং সামৰি লণ্ডনত বাকী ৭০ শতাংশৰ কামত ব্যস্ত এতিয়া অভিনেতা সিদ্ধাৰ্থ শৰ্মাকে ধৰি ছবিখনৰ সৈতে জড়িত আন কলা-কুশলীসকল । সিদ্ধাৰ্থ শৰ্মাই অলপতে লণ্ডনৰ পৰা আপলোড কৰা এটা ভিডিঅ’ ভাইৰেল হৈছিল, আমি সকলোৱে দেখিছোঁ অভিনেতা সিদ্ধাৰ্থ শৰ্মাই "কেকে" চৰিত্ৰটোৰ জৰিয়তে খুহুতীয়া ইংৰাজী কৈ কিমান দৰ্শকক মনোৰঞ্জন প্ৰদান কৰি আহিছে ! ঠিক তেনে ইংৰাজীতেই চিনেমেট’গ্ৰাফাৰৰ লগত কৰা কথোপকথনৰ এটি ভিডিঅ’ সামাজিক মাধ্যমত তেওঁ প্ৰচাৰ কৰে । "কেকে" চৰিত্ৰটোক যেন আকৌ এবাৰ জীয়াবলৈ বিচাৰিলে অভিনেতা সিদ্ধাৰ্থ শৰ্মাই ।