Murder in Guwahati: স্কুটাৰৰ চাবিৰে ডিঙি ৰেপি হত্যা পশু চিকিৎসক তথা যুৱ ব্যৱসায়ীক

স্কুটাৰৰ চাবিৰে ডিঙি ৰেপি হত্যা এজন পশু চিকিৎসক তথা যুৱ ব্যৱসায়ীক ৷ বৰবাৰী প্ৰতীক্ষা হাস্পতালৰ সন্মুখত থকা 77 নামৰ ৰেষ্টুৰেন্টখনত শনিবাৰে নিশা সংঘটিত হৈছে এই হত্যাকাণ্ড ৷ চিকিৎসক তথা ব্যৱসায়ীজনৰ নাম খঞ্জিত মেধি ৷ হত্যাৰ অভিযোগত নিশাই দিছপুৰ আৰক্ষীয়ে আটক কৰে সুভাষ বসুমতাৰী নামৰ এজনক ৷

গুৱাহাটী, 23 অক্টোবৰ: মহানগৰীত দিনক দিনে বৃদ্ধি পাইছে বিভিন্ন অপৰাধজনিত ঘটনা ৷ চুৰি, নিচাজাতীয় দ্ৰব্যৰ সৰবৰাহ তথা হত্যাৰ দৰে ঘটনাই নিতৌ সংবাদ মাধ্যমৰ শিৰোনাম দখল কৰি আহিছে ৷ বিগত কেইমাহ ধৰি ইটোৰ পিছত সিটোকৈ হত্যাকাণ্ড সংঘটিত হৈ আহিছে মহানগৰীত ৷ মানৱতা যেন ক্ৰমশঃ হেৰাই যাবলৈ ধৰিছে একাংশৰ বাবে ৷

শেহতীয়াকৈ পুনৰ মহানগৰীত সংঘটিত হৈছে এক লোমহৰ্ষক হত্যাকাণ্ড (Murder in Guwahati) ৷ স্কুটাৰৰ ছাবিৰে ডিঙি ৰেপি হত্যা এজন পশু চিকিৎসক তথা যুৱ ব্যৱসায়ীক (Veterinarian Docter Murder) ৷ বৰবাৰী প্ৰতীক্ষা হাস্পতালৰ সন্মুখত থকা 77 নামৰ ৰেষ্টুৰেন্টখনত শনিবাৰে নিশা সংঘটিত হৈছে এই ঘটনা ৷

ঘটনাৰ বিৱৰণী অনুসৰি, শনিবাৰে নিশা আনুমানিক 10 বজাত খঞ্জিত মেধি নামৰ পশু চিকিৎসকজন গৈছিল বৰবাৰী প্ৰতীক্ষা হাস্পতালৰ সন্মুখত থকা 77 নামৰ ৰেষ্টুৰেন্ট এখনত ৷ ৰেষ্টুৰেন্টখনৰ মালিক আছিল খঞ্জিত মেধিৰ বন্ধু ৷ সেয়েহে বন্ধুৰ লগত কিছু সময় অতিবাহিত কৰিবলৈ ৰেষ্টুৰেন্টখনলৈ গৈছিল খঞ্জিত মেধি ৷ ৰেষ্টুৰেন্টখনত বহি কথোপকথনত মগ্ন হৈ আছিল ৰেষ্টুৰেন্টখনৰ মালিক আৰু খঞ্জিত মেধি ৷ সেইখিনিলৈকে সকলো ঠিকে আছিল ৷ কিন্তু ইয়াৰ পিছতে হঠাৎ সলনি হৈ পৰে সকলো দৃশ্যপট ৷

এইখিনিতে এটা কথা উল্লেখ কৰিব লাগিব যে এই ৰেষ্টুৰেন্টখনত বহুদিনৰে পৰা কৰ্মৰত হৈ আছিল ঊষা বসুমতাৰী নামৰ এগৰাকী মহিলা ৷ ৰেষ্টুৰেন্টখনৰ কৰ্মচাৰী ঊষা বসুমতাৰীৰ পুত্ৰ সুভাষ বসুমতাৰী ৷ সুভাষ বসুমতাৰীৰ অভিযোগ মাতৃয়ে ৰেষ্টুৰেন্টখনৰ পৰা পাবলগীয়া আছিল 4 হাজাৰ টকা ৷ কিন্তু ৰেষ্টুৰেন্ট কৰ্তৃপক্ষই সেই ধন আদায় দিয়া নাছিল মাতৃ উষা বসুমতাৰীক ৷ সেয়েহে সুভাষ বসুমতাৰীয়ে শনিবাৰে নিশা মাতৃ কৰ্মৰত 77 নামৰ সেই ৰেষ্টুৰেন্টত উপস্থিত হয় ৷

ৰেষ্টুৰেন্টত উপস্থিত হৈয়ে সুভাষ বসুমতাৰীয়ে মাতৃয়ে পোৱা ধন আদায় দিবলৈ কয় ৰেষ্টুৰেন্টখনৰ মালিকক ৷ কিন্তু ধন বিচৰাৰা বাবেই দুয়োৰে মাজত সৃষ্টি হয় তীব্ৰ বাক-বিতণ্ডাৰ ৷ এই সকলোবোৰ হৈ আছিল সেই সময়ত ৰেষ্টুৰেন্টখনত উপস্থিত থকা চিকিৎসক খঞ্জিত মেধিৰ সন্মুখত ৷

এই বাক বিতণ্ডা ক্ৰমাৎ বাঢ়ি অহাত ৰেষ্টুৰেন্টখনত উপস্থিত থকা চিকিৎসক খঞ্জিত মেধিয়ে বাধা প্ৰধান কৰিছিল দুয়োকে ৷ দুয়োপক্ষক কাজিয়া নকৰিবলৈ বাধা দিছিল চিকিৎসকজনে ৷ কিন্তু বাধা প্ৰদান কৰাই যেন কাল হ’ল চিকিৎসকজনৰ বাবে ৷ বাক বিতণ্ডাত বাধা দিয়াৰ বাবেই সুভাষে খঞ্জিতক হাতত থকা স্কুটাৰৰ চাবিৰে ডিঙি ৰেপি হত্যা কৰাৰ অভিযোগ ৷ ইয়াৰ পিছতেই লগে লগেই ঢলি পৰে চিকিৎসকগৰাকী (Murder case) ৷

ইতিমধ্যেই আৰক্ষীয় আটক কৰিছে সুভাষক ৷ আৰক্ষীৰ অভিযোগ ড্ৰাগছ আসক্ত আছিল সুভাষ ৷ আনহাতে সমগ্ৰ হত্যাকাণ্ডক লৈ মৃত খঞ্জিতৰ পৰিয়ালৰ বিস্ফোৰক অভিযোগ । সুৰাপান কৰাই খঞ্জিতক ৰেষ্টুৰেন্টখনৰ বন্ধুবৰ্গই পৰিকল্পিতভাৱে হত্যা কৰিছে । খঞ্জিতৰ সৈতে ৰেষ্টুৰেন্টখনৰ মালিকৰ বহু টকাৰ লেনদেন থকা বুলিও অভিযোগ উত্থাপন কৰে পৰিয়ালবৰ্গই । ইফালে খঞ্জিতক প্ৰথমতে প্ৰতীক্ষা হাস্পতাললৈ নিয়া হৈছিল যদিও পিছত ছয়মাইলৰ GNRC হাস্পতাললৈ অনা হয় । GNRC ত মৃত ঘোষণা কৰে চিকিৎসকে । আনফালে দিছপুৰ আৰক্ষীয়ে সুভাষক আটক কৰি আৰম্ভ কৰিছে তদন্ত । এতিয়া আৰক্ষীৰ তদন্ততহে পোহৰলৈ আহিব সমগ্ৰ ঘটনাৰ ৰহস্য ৷

লগতে পঢ়ক:Murder in Guwahati : মহানগৰীত ভাতৃৰ হাতত প্ৰাণ হেৰুৱালে ককায়েক