গুৱাহাটী, 31 ডিচেম্বৰ : অসমত এনে কি সম্পদ আছে যে কোনোবাই ইনাৰলাইন পাৰ্মিট লৈ চাবলৈ আহিব ? এই মন্তব্য মাত্ৰ দুদিন পূৰ্বে দিল্লীত শান্তি চুক্তি স্বাক্ষৰ কৰি আজি অসমত ভৰি দিয়া অন্যতম আলোচনাপন্থী আলফা নেতা শশধৰ চৌধুৰীৰ ৷ দিল্লীত চুক্তি স্বাক্ষৰৰ পিছত আদৰণিৰ সমান্তৰালভাৱে সহস্ৰজনৰ কঠোৰ সমালোচনাৰ সন্মুখীন হৈছে আলোচনাপন্থী গোটৰ আলফা নেতাসকল ৷ কিছুমান প্ৰসংগ উত্থান নকৰা বা শান্তি চুক্তিত অন্তৰ্ভুক্ত নোহোৱাৰ বাবে প্ৰশ্নৰ সন্মুখীন হৈছে অনুপ চেতিয়া, অৰবিন্দ ৰাজখোৱা, শশ চৌধুৰী আদি ৷
বিশেষকৈ উত্থাপিত হৈছে যে কিয় চুক্তিত সন্নিৱিষ্ট কৰিব নোৱাৰিলে ILP অৰ্থাৎ আন্তঃৰাজ্যিক পাৰপত্ৰৰ প্ৰসংগও ? এই প্ৰসংগত শশধৰ চৌধুৰীয়ে কৰা মন্তব্যই ৰাজ্যত বিশেষ চৰ্চা লাভ কৰিছে ৷ গুৱাহাটীত দেওবাৰে শ্ৰীমন্ত শংকৰদেৱ কলাক্ষেত্ৰত সংবাদমেলত সাংবাদিকৰ ধাৰাবাহিক প্ৰশ্ন আলোচনাপন্থী আলফা নেতৃত্বলৈ ৷ শান্তি চুক্তি স্বাক্ষৰকাৰী গোটৰ এগৰাকী প্ৰধান নেতা শশ চৌধুৰীৰ মুখত আখৈ ফুটাদি ফুটিছে উত্তৰ ৷