গুৱাহাটী, ৬ ডিচেম্বৰ:যোৱা ৩ ডিচেম্বৰত আজ্ঞাঠুৰীৰ ড্ৰাগছ ব্যৱসায়ী আৰু আৰক্ষীৰ মাজত সংঘটিত ঘটনাই লৈছে নতুন মোৰ । গুলীয়াগুলীৰ ঘটনাত মৃত্যু হোৱা ড্ৰাগছ ব্যৱসায়ী আব্দুল চালামৰ কন্য়া আৰু পত্নীয়ে অভিযোগ কৰা মতে, কোনো ড্ৰাগছ ব্য়ৱসায়ৰ লগত জড়িত নাছিল চালাম । মিছাকৈ ড্ৰাগছ মাফিয়া সজাই আৰক্ষীৰ সৈতে মিলি আব্দুল চালামক বন্ধু আছিমুদ্দিন আৰু বাহাৰ আলীয়ে হত্য়া কৰা বুলি চালামৰ কন্য়া আৰু পত্নীয়ে অভিযোগ কৰিছে ।
এই প্ৰসংগত চালামৰ কন্য়াই অভিযোগ উত্থাপন কৰি কয় যে ঘৰৰ পৰা আছিমুদ্দিনে ছালামক গাড়ীখনত লৈ গৈছিল জালুকবাৰীলৈ বুলি । জালুকবাৰী পোৱাৰ পিছতে ফোন বন্ধ হৈছিল চালামৰ । চালামৰ কন্য়া আৰু পত্নীৰ মতে কোনো ড্ৰাগছৰ লগত জড়িত নাছিল চালাম । চালাম যদিও প্ৰথমে গাড়ীচালক আছিল, বিগত ২ বছৰ ধৰি আৰক্ষীৰ ইনফৰ্মাৰ হিচাপে কাম কৰি আছিল । আছিমুদ্দিনেই ইনফৰ্মাৰ সজাইছিল চালামক ।
পৰিয়ালৰ মতে, সেইদিনাও চালাম আৰক্ষীৰ গাড়ীতেই গৈছিল । কিন্তু আছিমুদ্দিন আৰু বাহাৰে পৰিকল্পনা কৰি মাৰিলে ছালামক । যদি ছালামৰ লগত পিষ্টল আছিল , ড্ৰাগছ আছিল আৰক্ষীয়ে কিয় ঘটনা সংঘটিত হোৱাৰ দিনা সংবাদ মাধ্যমৰ জড়িয়তে দেখুৱাব পৰা নাই । ইতিমধ্যে পৰিয়ালৰ লোকে আছিমুদ্দিন আৰু বাহাৰৰ বিৰুদ্ধে হাতীগাঁও থানাত দাখিল কৰিছে এজাহাৰ । কিন্তু হাতীগাঁও আৰক্ষীয়ে বিগত দুদিনে এবাৰো সোধপোছ কৰিবলৈ ফোন নকৰাৰো অভিযোগ পৰিয়ালৰ লোকৰ ।