দিনৰ 11 বজাৰ দহটা শীৰ্ষ সংবাদ

দিনৰ 11 বজাৰ দহটা শীৰ্ষ সংবাদ

টিংৰাইত বোমা বিস্ফোৰণৰ ঘটনাত জড়িত থকাৰ সন্দেহত এজন যুৱকক আটক । আটকাধীন অভিযুক্ত যুৱকজন নাজিৰাটিং তামুলী বন গাঁৱৰ দিপেন শইকীয়া (২৮) ৷ বৰ্তমান আৰক্ষীয়ে যুৱকজনক সোধপোছ অব্যাহত ৰাখিছে ৷

শনিবাৰে নিশা নগাঁৱৰ এঘাৰমাইলত সংঘটিত এক বিধ্বংসী অগ্নিকাণ্ডত নিমিষতে ছাই হৈ গ'ল সাতখনকৈ ব্যৱসায়িক প্ৰতিষ্ঠান ৷ বৈদ্যুতিক শ্বৰ্ট চাৰ্কিটৰ ফলতেই অগ্নিকাণ্ডটো সংঘটিত হোৱাৰ সন্দেহ স্থানীয় ৰাইজৰ ৷ অগ্নিকাণ্ডত কামপুৰ আৰু নগাঁও অগ্নিনিৰ্বাপক বাহিনীৰ সাতখনকৈ বাহন উপস্থিত হৈ স্থানীয় ৰাইজৰ সহযোগত জুই নিৰ্বাপন কৰে ৷

দেওবাৰে পুৱতি নিশা শিৱসাগৰ চহৰৰ ষ্টেচন চাৰিআলিৰ নতুন দৈনিক বজাৰত সংঘটিত হয় এক বিধ্বংসী অগ্নিকাণ্ড ।‌ অগ্নিকাণ্ডত 30 খনৰো অধিক ব্যৱসায়িক প্ৰতিষ্ঠান ভস্মীভূত হোৱাৰ লগতে কোটি কোটি টকাৰ সা-সম্পত্তি জুইত জাহ যায় । বিদ্যুতৰ শ্বৰ্ট চাৰ্কিটৰ ফলতেই জুইৰ সূত্ৰপাত হোৱা বুলি সন্দেহ কৰা হৈছে ।

8 মে’ৰ নিশা হঠাৎ অগ্নিৰ সূত্ৰপাত হৈছিল তেজপুৰৰ চ’ক বজাৰৰ কোনো এটা দোকান গৃহত ৷ আৰু তাৰ পাচতেই ফিৰিঙতিৰ পৰা খাণ্ডৱ দাহৰ দৰে পৰিস্থিতিৰ সৃষ্টি হয় ৷ দোকান গৃহটোৰ জুই মূহুৰ্ততে বিয়পি পৰে বজাৰখনৰ আন দোকান সমূহলৈ ৷ সান্ধ্য আইনৰ বাবে তেতিয়া জনশূন্য আছিল সমগ্ৰ অঞ্চল ৷ নিমিষতে প্ৰায় 300 দোকান ভস্মীভূত হয় এই অগ্নিকাণ্ডত ৷

নগাঁৱৰ 18 টাকৈ হাতীৰ মৃত্যুৰ তদন্তৰ দাবী বাক্সাৰ দুই সংগঠনৰ
শনিবাৰে বাক্সা জিলাৰ শালবাৰীৰ মানাহ ৰাষ্ট্ৰীয় উদ্যানৰ সন্মুখত তপতজুৰিত 18 টাকৈ বনৰীয়া হাতীৰ মৃত্যু সন্দৰ্ভত সদৌ অসম আদিবাসী ছাত্র সন্থা আৰু মানাহ আঞ্চলিক ছাত্ৰ সন্থাই প্ৰতিক্ৰিয়া প্ৰকাশ কৰে ৷ বজ্রপাতত একেলগে 18 টাকৈ হাতীৰ মৃত্যু অস্বাভাৱিক বুলি মন্তব্য কৰাৰ লগতে ইয়াৰ উচিত তদন্তৰ দাবী কৰিছে সংগঠন দুটাই ৷

আনন্দক লৈ নগাঁৱত আনন্দৰ জোৱাৰ । যোগদানৰ পূৰ্বেই আই পি এছ বিষয়া আনন্দ মিশ্রক সমাজিক মাধ্যমযোগে ব্যাপক আদৰণি বিভিন্ন মহলৰ । ডঃ হিমন্ত বিশ্ব শৰ্মাৰ নেতৃত্বত চৰকাৰ গঠন হোৱাৰ পিছতেই ৰাজ্যৰ আৰক্ষী অধীক্ষক পৰ্য্যায়ত হোৱা প্ৰথমটো ৰদ বদলত ধুবুৰীৰ আৰক্ষী অধীক্ষক আনন্দ মিশ্রক বদলি কৰা হৈছে নগাঁও জিলা আৰক্ষী অধীক্ষক হিচাপে ।

বৰপেটাত প্ৰতিদিনে বৃদ্ধি পাইছে কৰ’ণাত আক্ৰান্ত ৰোগীৰ সংখ্যা ৷ শনিবাৰে জিলাখনত 6 গৰাকী ক’ভিড-19 ত আক্ৰান্ত ৰোগীৰ মৃত্যু হয় ৷ সম্প্ৰতি জিলাখনত ক’ভিড-19 ত আক্ৰান্ত হৈ মৃত্যু হোৱা লোকৰ সংখ্যা 41 গৰাকীলৈ বৃদ্ধি পাইছে ৷

জোৰামত এই পৰ্যন্ত কৰ’ণাত আক্ৰান্ত হৈ মৃত্যু হৈছে 23 গৰাকী লোকৰ ৷ আনহাতে এই পৰ্যন্ত কৰ’ণাৰ পৰা আৰোগ্য লাভ কৰিছে 6498 গৰাকী লোকে ৷ 15 মে’ তাৰিখলৈকে ৰাজ্যখনত 1978 গৰাকী কৰ’ণাত আক্ৰান্ত ৰোগী থকা বুলি জানিবলৈ দিছে ৰাজ্যখনৰ স্বাস্থ্য বিভাগে ৷

দক্ষিণ ত্ৰিপুৰা জিলাৰ অন্তৰ্গত গাবতালী অঞ্চলত হৰিডয় দে (১৩) আৰু তেওঁৰ সৰু ভগ্নী গীতা দে (১১)ক নৃশংসভাৱে হত্যা সুগ্ৰীভ ত্ৰিপুৰা নামৰ লোকজনৰ ।

চুবুৰীয়া দেশ নেপালৰ পৰ্বতাৰোহীৰ পৰা ক'ভিড-১৯ ৰ সংক্ৰমণ হোৱাৰ আশংকাত চলিত বৰ্ষতো চীনৰ ফালৰ পৰা মাউণ্ট এভাৰেষ্ট আৰোহণৰ কাৰ্যসূচী বাতিল কৰা হৈছে । শুকুৰবাৰে এক জাননীযোগে এই কথা নিশ্চিত কৰে চীনৰ চৰকাৰে । চলিত বৰ্ষৰ বাবে ৩৮ জন পৰ্বতাৰোহীক মাউণ্ট এভাৰেষ্ট আৰোহণৰ অনুমতি দিছিল চীনে ।