দুপৰীয়া 1 বজাৰ শীৰ্ষ দহটা বাতৰি...

দুপৰীয়া 1 বজাৰ শীৰ্ষ দহটা বাতৰি

হোজাইৰ বিষ্ণুপল্লীত নিশা শিলাদিত্য দেৱক আক্ৰমণৰ অপচেষ্টা চলোৱাৰ ঘটনাক লৈ সৃষ্টি হৈছে তীব্ৰ প্ৰতিক্ৰিয়া ৷ বিষ্ণুপল্লী বিষ্ণুমন্দিৰত আয়োজিত দৌল উৎসৱৰ কাৰ্যসূচীৰ সাংস্কৃতিক মঞ্চ মুকলি কৰিবলৈ বিধায়ক শিলাদিত্য দেৱক আয়োজক সমিতিয়ে আমন্ত্ৰণ জনাইছিল ৷

দেওবাৰে কেন্দ্ৰীয় স্বাস্থ্য মন্ত্ৰালয়ৰ তথ্য অনুসৰি, ভাৰতত যোৱা ২৪ ঘণ্টাত ৬২,৭১৪ জন লোক নতুনকৈ COVID-১৯ ত আক্ৰান্ত হৈছে । ফলত ১,১৯,৭১,৬২৪ জনলৈ আক্ৰান্তৰ সংখ্যা বৃদ্ধি পায় ।

কৰিমগঞ্জৰ বদৰপুৰৰ মালুয়াৰ নিৰ্বাচনী সভাত খোৱাপানীৰ পৰা আদি কৰি অন্যান্য যাৱতীয় ব্যৱস্থা উপলব্ধ নাছিল ৷ তাকে দেখি খং উঠিল এআইইউডিএফ প্ৰধান বদৰুদ্দিন আজমলৰ ৷

ছয়গাঁৱত অগপত ব্যাপক খহনীয়া ৷ বটাহিদিয়া গাঁও পঞ্চায়তৰ সভাপতিসহ ৯ গৰাকী সদস্যৰ কংগ্ৰেছত যোগদান ৷ সমষ্টিটোৰ ৰাজীৱ ভৱনত শনিবাৰে নিশা প্ৰায় ১১ বজাত আটাইকেইগৰাকী পঞ্চায়ত প্ৰতিনিধিয়ে কংগ্ৰেছত যোগদান কৰে ৷

আঙুৰা পঞ্চায়তৰ অন্তৰ্গত দত্তগাঁৱত এখন নিৰ্বাচনী জনসভাত অংশগ্ৰহণ কৰিছিল বিহাৰ বিজেপিৰ মিত্ৰদল ৰাষ্ট্ৰীয় লোক সমতা দলৰ প্ৰাৰ্থী প্ৰণৱ কুমাৰ ৰয়ে ৷ এই জনসভাতেই ৰাজনৈতিক হিংসাৰ বলি হ’ব লগা হৈছিল প্ৰাৰ্থী প্ৰণৱ কুমাৰ ৰয় ৷

শনিবাৰে ৰহা সমষ্টিৰ মহাজোঁটৰ প্ৰাৰ্থী শশীকান্ত দাসৰ হৈ নিৰ্বাচনী প্ৰচাৰ চলালে বি পি এফ প্ৰধান হাগ্ৰামা মহিলাৰী আৰু ৰাজ্যিক মুখপাত্ৰ তথা প্ৰদেশ কংগ্ৰেছৰ সাধাৰণ সম্পাদক অপূৰ্ব ভট্টাচাৰ্যই ৷ প্ৰচাৰ সভাত হিমন্ত বিশ্ব শৰ্মাক বাক্য বানেৰে থকা সৰকা কৰে বিটিছিৰ প্ৰাক্তন প্ৰধান গৰাকীয়ে ।

ত্ৰিপুৰাৰ লগতে উত্তৰ-পূৱক চট্টগ্ৰাম আৰু চিলেট আন্তঃৰাষ্ট্ৰীয় বিমানবন্দৰ ব্যৱহাৰৰ বাবে প্ৰস্তাৱ আগবঢ়াইছে বাংলাদেশে ৷ প্ৰেছ ইনফৰমেশ্যন ব্যুৰ'ৰ এক যুটীয়া বিবৃতিত সদৰী কৰা হৈছে এই কথা ৷ বাংলাদেশৰ প্ৰধানমন্ত্ৰী গৰাকীয়ে উত্তৰ-পূৱ ভাৰতৰ লোকসকল বিশেষকৈ ত্ৰিপুৰাৰ লোকসকলক চট্টগ্ৰাম আৰু চিলেট আন্তঃৰাষ্ট্ৰীয় বিমানবন্দৰ ব্যৱহাৰৰ বাবে প্ৰস্তাৱ আগবঢ়াইছে ৷

দেওবাৰে কানপুৰৰ লক্ষ্মীপত সিংঘানীয়া (এলপিএছ) ইনষ্টিটিউট অৱ কাৰ্ডিঅ'লজীত অগ্নিকাণ্ড ৷ মুখ্যমন্ত্ৰী যোগী আদিত্যনাথে ঘটনা সন্দৰ্ভত প্ৰতিক্ৰিয়া প্ৰকাশ কৰি ৰোগীৰ তাৎক্ষণিক যত্নৰ লগতে ঘটনাটোৰ বিষয়ে তদন্তৰ নিৰ্দেশ প্ৰদান কৰে ৷

কৰ’ণা মহামাৰীৰ গণ সংক্ৰমণ বৃদ্ধি পোৱাৰ ফলত তেলেংগানা চৰকাৰে 30 এপ্ৰিললৈকে ৰাজহুৱা অনুষ্ঠান-প্ৰতিষ্ঠান, উৎসৱ পালন আদিৰ লগতে ৰাজহুৱা সভা সমিতি, শোভাযাত্ৰা আদি বন্ধ ৰখাৰ সিদ্ধান্ত গ্ৰহণ কৰিছে ৷

অৱশেষত ক্ষমা বিচাৰিলে জ্যেষ্ঠ কংগ্ৰেছ নেতা তথা প্ৰাক্তন কেন্দ্ৰীয় মন্ত্ৰী শশী থাৰুৰে । বাংলাদেশত প্ৰধানমন্ত্ৰী নৰেন্দ্ৰ মোডীয়ে ভাষণ প্ৰসংগত ভাৰতৰ প্ৰাক্তন প্ৰধানমন্ত্ৰী ইন্দিৰা গান্ধীক লৈ কৰা মন্তব্যৰ বাবে তীব্ৰ সমালোচনা কৰিছিল জ্যেষ্ঠ কংগ্ৰেছ নেতাগৰাকীয়ে । মহামাৰীৰ সংক্ৰমণ অব্যাহত থকাৰ মাজতে প্ৰথমবাৰৰ বাবে বিদেশ ভ্ৰমণ কৰিবলৈ গৈছে প্ৰধানমন্ত্ৰী গৰাকীয়ে ।