বিয়লি 5 বজাৰ শীৰ্ষ দহটা বাতৰি

বিয়লি 5 বজাৰ শীৰ্ষ দহটা বাতৰি

নগাঁও জিলা আৰক্ষী অধীক্ষক হিচাপে আনন্দ মিশ্ৰই যোগদান কৰাৰ পিছৰে পৰা নগাঁৱত ধাৰাবাহিকভাৱে ড্ৰাগছৰ বিৰুদ্ধে অভিযান অব্যাহত ৰাখিছে ৷ জিলাখনত সংঘটিত হৈ থকা বিভিন্ন ধৰণৰ অপৰাধৰ বিৰুদ্ধে অভিযান অব্যাহত ৰাখিছে নৱ নিযুক্ত আৰক্ষী অধীক্ষক গৰাকীয়ে ৷

ৰঙিয়াৰ খন্দিকৰত দুৰ্বৃত্তৰ তাণ্ডৱ । খন্দিকৰ গাঁৱত এগৰাকী শিক্ষকে আঢ়ৈ বিঘা মাটিত তামোল, কল, ভিন্ন সোৱাদৰ টেঙাকে ধৰি বহু ঔষধিযুক্ত গছপুলি ৰোপণ কৰিছিল । কিন্তু নিশাৰ অন্ধকাৰৰ সুযোগ লৈ কোনো দুৰ্বৃত্তই এফালৰ পৰা গছসমূহ কাটি তহিলং কৰে । এই ঘটনাই সমগ্ৰ খন্দিকৰ অঞ্চলত চাঞ্চল্যৰ সৃষ্টি কৰিছে ।

শিৱসাগৰৰ দিখৌমুখৰ ৰাজতিলক সাউদ নামৰ যুৱকজনে উদ্ভাৱন কৰিছে হেণ্ড চেনিটাইজাৰ মেচিন আৰু পানীৰ টেপ ৷ কোনো ধৰণৰ ছুইছৰ প্ৰয়োজন নোহোৱাকৈ হেণ্ড চেনিটাইজাৰ মেচিন আৰু পানীৰ টেপৰ সন্মুখত হাতখন দিলে নিজে নিজে চেনিটাইজাৰ আৰু পানী ওলাই আহে ।

শিৱসাগৰ আৰু শিমলুগুৰি আৰক্ষীয়ে সোমবাৰে নিশা আটক কৰা জাতীয় সংগঠন আৰু ৰাইজৰ দলৰ চাৰিওগৰাকী যুৱ নেতাক মঙলবাৰে পুৱা প্ৰায় 10 বজাত মুকলি কৰি দিয়ে আৰক্ষীয়ে । কোনো কাৰণ নোহোৱাকৈ জাতীয় সংগঠন কেইটাৰ প্ৰতিনিধিক আটক কৰা ঘটনাই সৃষ্টি কৰিছে প্ৰতিক্ৰিয়াৰ ৷

আসন্ন তীব্ৰবেগী ঘূৰ্ণী বতাহ য়াছৰ ফলত ওড়িশা আৰু পশ্চিমবংগৰ সীমান্তত ভূমিস্খলন হোৱাৰ সম্ভাৱনা ব্যক্ত কৰিছে ভাৰতীয় বতৰ বিজ্ঞান কেন্দ্ৰই ৷ বতৰ বিজ্ঞান কেন্দ্ৰৰ এই তথ্যৰ ভিত্তিত ইতিমধ্যে জিলা দুখনৰ প্ৰশাসনে স্থানীয় লোকসকলক বাসগৃহৰ পৰা জগতসিংপুৰ জিলাৰ আশ্ৰয়গৃহলৈ স্থানান্তৰ কৰিছে ।

শেহতীয়াকৈ সামাজিক মাধ্যম ব্যৱহাৰ কৰাৰ লগতে ইউ টিউবৰ জৰিয়তে জনপ্ৰিয়তা অৰ্জন কৰিছে দেশৰ বহু যুৱক-যুৱতীয়ে । কিন্তু একাংশ ইউ টিউবাৰে ভুল তথ্য যোগান ধৰি বিভ্ৰান্তি সৃষ্টি কৰাও দেখা গৈছে । এইবাৰ ইউ টিউবত ভুল তথ্য দি গ্ৰেপ্তাৰ লুধিয়ানাৰ এজন ইউ টিউবাৰ ।

নগাঁৱৰ পুৰণিগুদামৰ কাষৰ গাঁৱত অৱস্থিত পিআৰএল নামৰ পথ নিৰ্মাণ কৰা কোম্পানীটোৱে যোৱা এটা বছৰ ধৰি উৰিয়াগাঁৱৰ পৰা টেলিয়াগাঁৱলৈকে চাৰিলেনযুক্ত পথ নিৰ্মাণ কাৰ্যত নিয়োজিত হৈ আছে । কিন্তু বিগত কিছুদিন ধৰি সেই কোম্পানীটোৰ পৰা অহৰহ ক'লা ধোঁৱা ওলাই থকা বুলি অভিযোগ কৰিছে স্থানীয় ৰাইজে ৷

কপিলী নদীত সন্ধানহীন যুৱক ৷ সাতুৰি কপিলী নদী পাৰ হ’বলৈ চেষ্টা কৰোতেই নদীৰ মাজত ডুৱ যায় যুৱকজন ৷ অব্যাহত এছ ডি আৰ এফৰ বাহিনীৰ অভিযান ৷

পুত্ৰ ক'ভিডত আক্ৰান্ত হৈ হোম আইচ'লেশ্যনত থকাৰ বাবে ত্ৰিপুৰাত প্ৰশাসনে কৰিলে এগৰাকী বৃদ্ধাৰ অন্তিত সৎকাৰ । ক'ভিডত আক্ৰান্ত হৈ মৃত্যু হোৱাৰ সন্দেহত বৃদ্ধাগৰাকীৰ জীয়েক তথা আত্মীয় আৰু স্থানীয় লোকো নাহিল অন্ত্যেষ্টিক্ৰিয়ালৈ ।

তেলেংগানা চৰকাৰে আৰম্ভ কৰিলে ক’ভিড 19 ৰ দ্বিতীয় পালি প্ৰতিষেধক প্ৰদানৰ কাৰ্যসূচী । ৰাজ্য চৰকাৰে মঙলবাৰৰ পৰা আৰম্ভ কৰে এই কাৰ্যসূচী । এই কাৰ্যসূচী ৰাজ্যৰ সকলো চৰকাৰী চিকিৎসালয়ত আৰম্ভ হৈছে । লগতে প্ৰতিখন জিলাৰ চৰকাৰী টীকাকৰণ কেন্দ্ৰসমূহতো এই কাৰ্যসূচী আৰম্ভ কৰা হৈছে ।